中六個年 我鍾意左叫我起身個女仔: 澄、晴(五)

上完最後三堂，我揹起背囊就衝咗出班房。

「借開啊屌你老母！」我一邊跑一邊大嗌。

我已經唔理我聽日會唔會比人捉去青山，總之我而家要盡快跑到落去地下。

落到嚟地下，我即刻跑去佢上堂間房門。

仆街，燈都閂埋，應該都走咗好耐。



我衝出去校門外面條天橋，然後我就離遠見到佢企喺天橋另一邊嘅垃圾桶隔離傾緊電話。

我跑過去，然後…

「喂！去邊啊？」

啊澄喺側邊條樓梯到彈咗上嚟，擋喺我前面。

「唔好阻住先。」我諗住喺佢隔離行過去。



佢繼續阻住我：「咁急做咩？趕住投胎啊？」

我再趌個頭出去望，啊晴已經走咗。

我嘆咗啖氣：「想點啊？」

「係咪諗住當冇事發生過先？」

「你想點啊？」



「比個補償方案嚟聽下。」

「明明個茄輪係你打落我到架喎，關我咩事？」

「你咪理，總之你要補償返。」

「你飲唔飲酒架？」我問佢。

「梗係飲啦，你講笑啊？」佢雙眼發曬光咁望住我：「係咪你請先？」

「都得，邊間？」

呢一刻嘅我唔想理咁多，請就請啦，因為我淨係想快啲搞掂，然後跑過去搵啊晴。

「成個區得嗰一間，仲有第二間咩？」



「Duel，咁我走得未？」

「Why not？」佢行埋一邊。

「咁禮拜五見，你知我IG架啦。」

「Bye~」

佢肯定知我IG，因為我PoPo個簡介到有我IG名。

我向住天橋另一邊跑過去，但係已經見唔到啊晴。

我即刻打電話比佢，然後…



佢Cut咗線。

我可以肯定係Cut線，因為熄機或者Block咗會係「暫時未能接通」，而傾緊就係「正在使用中」，而佢係咩都冇講就Cut咗，所以唔會有錯。

我再打多次，今次係「暫時未能接通」。

希望只係佢熄咗機，而唔係Block咗我。

我收埋電話，嘆咗啖氣：「佢睇到啲咁激嘅嘢，真係要啲時間消化下。」

講就咁講，但係我返到屋企之後都一直用唔同方法去試下搵佢，雖然到最後都係搵唔到佢。