中六個年 我鍾意左叫我起身個女仔: 澄、晴(六)

第二日返到去，坐喺我隔離嘅已經唔係啊晴。

「你邊位？」我擺低袋，然後坐低：「啊晴呢？」

「調咗位。」

「邊個調？」我問佢：「你好想叫我起身咩？」

「唔係，我唔會叫你起身。」



「咁點解會調咗呢？」

「利益。」佢望住調咗去最後排近窗台嗰個位嘅啊晴。

「咪玩啦，有咩利益啊？」我以為佢講緊笑。

佢喺銀包拎咗廿蚊出嚟：「佢每日廿蚊買我同佢調位。」

「咁一個月咪有成四百？」



「差唔多啦，冇四百都唔想坐過嚟。」

「洗唔洗講到我咁恐怖啊？」我有啲想打佢。

「你單嘢成間學校都知喇。」

「你講我同啊晴一齊？」

「其一，仲有另外一樣嘢。」



「廁所門口…」我唔係好想講出口。

「殘廁跌出嚟然後攬埋一舊瞓喺地下啊嘛！」

嗯，多謝你幫我講咗出嚟。

原本廢物爬上雲層已經好有討論度，再加多單「殘廁大戰」，我諗我已經做咗校內嘅KOL，但我嘅形象已經直插落谷底。

之後幾日，無論我係喺Whatsapp定學校搵佢，佢都無視我，而我都無再搵佢。

我係谷底嘅人，佢係飄喺雲層嘅人，我哋以前、而家同未來都唔會係同一個世界嘅人。

我只係一個飛行器都未裝好就想飛上去搵佢嘅傻仔，一堆雀仔撞埋嚟我就收皮。

毒撚想溝女神，要經過身邊所有人嘅洗禮，洗到最後唔爛皮先有得一齊。



唔好諗咁多喇，今日係Happy Friday，仲約咗啊澄，應該要開心啲。

我踏出門口，然後企喺門口諗咗陣，之後就開咗電話。

「我去飲酒，上次嗰間。」我Send咗個Whatsapp比啊晴。

「嗯。」佢秒覆咗我，然後又Offline。

心情冇咩起伏，因為都預咗。