中六個年 我鍾意左叫我起身個女仔: 澄、晴(八)

啊姐啱啱擺低Shot杯，啊澄就即刻斟滿咗佢，然後擺低枝嘢喺我面前。

「點，想玩咩？」我問佢。

「你揀啦。」佢翹埋雙手。

「你斟酒先啦。」我將枝嘢推去佢面前：「冇酒冇得玩。」

「我要飲先算啦。」佢擰返埋個樽蓋。



「都得。」我伸出雙手：「明啦？」

「明。」佢都伸出雙手：「開得波。」

讓下你，猜返個枚先。

「Lady first。」

「Sure。」佢啪咗啪手指：「聽枚。」



「請。」我攤咗攤右手，以示禮貌。

「五。」

中。

「十五。」

再中。



佢比返同一個手勢我：「請。」

無事嘅，技術性調整嚟架啫。

至少我係咁樣相信，直到…

「到我嗌。」我唞曬大氣：「五。」

中。

「開曬！」

中啊！

「飲啦屌你！」我推枝酒過去。



佢將枝酒枝反轉，然後…

半滴都冇。

九一開，我開始有少少Wing wing地。

「冇酒，咁我去個廁所先。」我起身。

佢起身過嚟扶住我：「你睇住啊。」

我揈開佢：「我掂啊，你定啦。」

佢「噗」一聲笑咗出嚟，然後坐返低：「咁你自便啦。」



「梗係啦，唔通叫你幫我逗住咩！」我扶住張櫈，死淨把口。

我扶住啲櫈，用咗一陣終於去到距離我個位五步遠嘅廁所。

痾個尿再洗個面，然後滿血復活。

行返出去，已經見到枱面有一壺Mix好咗嘅。

「喂啊仔！」老細叫我。

「咩事？」我問佢。

「上次臨收鋪，你嗌酒唔記得截住你，有枝你比咗錢但係未開。」

「有啲咁嘅事？」



「有啊，上次張單有落到，我收埋你錢架喇。」

「我想問…」

佢打斷咗我，唔比我問。

「唔好問，啊姐幫你mix曬架喇。」佢指住擺酒嗰張枱：「我驚下次唔記得。」

我望過去，六壺Mix好咗嘅酒已經喺枱上面擺好曬陣。

多謝你啊老細，你真係一個好有道德嘅生意人，酒吧業真係欠你一個交代。

「又有得玩，開心仔！」啊澄拍曬手。



「係呀，哈哈。」我失去靈魂咁苦笑。