中六個年 我鍾意左叫我起身個女仔: 相信(六)

「你仲有咩解釋？」啊晴問我。

「上咗去先講啦。」我都唔知點算好。

「講清楚先。」佢指住佢身後個石壆：「坐喺到。」

我望咗望守門口個老師，佢擰咗擰頭。

我將視線轉去啊澄到，佢向我打咗個眼色。



既然佢都肯留低，咁我都冇唔留低嘅理由。

我行過去石壆到坐低：「講啦，做咩？」

「你仲話你冇呃我，咁而家係咩事？」啊晴翹埋雙手。

「無論我有冇呃你，而家都唔重要啦。」我長嘆一口氣：「更何況…你啲演技都呃咗我。」

「係囉，其實佢依家點關你咩事啫？」啊澄補刀。



「你係咪已經冇諗過再傾落去？」啊晴耷低頭。

我依稀聽到佢喺到啜泣，搞到我都有少少心痛。

「問你最後一次，係咪冇嘢想講？」佢用手抹咗抹眼。

做人可以心痛，但唔可以心軟。

呃你一次嘅人，一定會呃你第二次。



我敲起勇氣，將我哋嘅關係撇得一乾二淨。

「係，我冇嘢想講，你都唔好再搵我。」

叫佢唔好再搵我嘅同時，都係叫緊我自己唔好再諗起佢。

「咁你走啦。」

「嗯，記得要準時上去，唔好遲到。」

我轉身同啊澄一齊行入去，而啊晴就坐咗喺石壆上面。

唔知係唔捨得，定係我純粹想提佢，我上樓梯上到一半嘅時候停低咗。

「你上去先啦啊澄。」



「嗯。」

我望住佢行，直到我同佢相隔半個看台咁遠。

見佢消失喺人群之中，我決定要講我想講嘅嘢。

我挨住欄杆，向坐喺門口對出石壆嘅啊晴大嗌：「喂，記住準時入嚟啊！」

成個人捲埋一舊，個頭埋起咗嘅佢伸隻手出嚟比咗個「OK」我。

明明我只係推開一個呃我嘅人，但唔知點解我都係好想喊。

唔通真係「有愛過，就點都要流返幾滴馬尿」？



唔好啦，好似有啲MK。

忍住先，好快冇事。