中六個年 我鍾意左叫我起身個女仔: 相信(七)

我返到我嗰班個區域，點完名就行咗上最後排坐。

我拎咗份日程表嚟睇，三千米要等到晏晝先有，仲要係最後一個項目。

既然係咁，我決定要睇書。

今日帶返嚟嘅書係《推銷員之死》嘅中文翻譯版。

點解會睇呢本書？因為聽完周國賢首《推銷員之死》，所以有興趣去了解首歌嘅靈感來源。



講就講得好聽，但《推銷員之死》係一本文學作品嚟。

咁大多數文學作品有咩共通點？一字記之曰：悶。

《推銷員之死》更加可以話係悶到核爆，因為嚴格嚟講佢唔係一本小說，而係一個劇本，所以係更加悶。

即係點？佢同教科書一樣有極強催眠作用。

我睇呢本書嘅時候冇試過連續睇十頁，因為我會悶到瞓着。



不過我已經冇嘢可以做，所以我決定今日要睇曬佢。

我揭返去上次睇到嗰頁，然後開始睇。

唔知點解，我越睇越慢，然後…

我瞓着咗。

我瞓醒之後，成個看台得返幾個人。



我唔撚係瞓到完場啊？

我睇咗睇電話，十二點十。

原來係放飯，仲以為我一瞓醒就走得咁瞓得。

我摸咗摸個肚，都有少少肚餓，但係…

得返十分鐘。

就算係買外賣都唔夠時間，因為要由運動場行到有賣人類食物嘅地方至少要行十分鐘。

唉，算啦，繼續瞓，瞓著咗就唔洗消耗咁多體力。

還掂最後一排都冇人坐，我決定佔用四個位嚟攤平個人。



我將本書冚喺塊面上面阻擋住晏晝猛烈嘅陽光，然後喺個腦裡面一直重覆「我唔肚餓」呢句嘢，好快就瞓著咗。

唔知瞓咗幾耐，結果我都係餓醒咗。

我望咗望小食部入口，圍曬板。

今次仆街了，一間跑跑下暈低都有可能。

我望咗望周圍，見到腳邊有個膠袋，裡面仲有個疑似係飯盒嘅物體。

我拎上嚟打開，係我最唔鍾意嘅叉油雞飯，但我已經唔理得咁多，我依家最緊要係填飽個肚先。

我三兩下就食曬成盒飯，雖然個味我一啲都唔鍾意，但至少我一間唔會跑跑下暈低先。