中六個年 我鍾意左叫我起身個女仔: 相信(八)

食完盒飯，我突然諗起一個問題。

「邊個無啦啦擺盒飯喺到？」

除咗啊晴同啊澄，我真係諗唔到仲有邊個。

但係有咩方法可以知道到底係邊個？

叉油雞飯？



我望多次個盒，上面咩字都冇，質地睇落都好劣，一定唔係大X樂或者大X活之類嗰啲。

一係燒味鋪，一係茶記。

但呢個範圍都係好大，所以我決定去收集更多情報。

我決定第一時間問咗啊澄先，因為以佢依家呢個身份嚟講，佢一定會答我。

我行落去，嚟到啊澄後面。



「喂。」我拍咗拍佢膊頭。

「屌！」佢成個人彈咗一下：「嚇撚死咩！做咩呀？」

「冇呀，想問你啱啱食咩啫。」

「燒味囉，做咩啊？」

「無，問下啫。」



「啊晴啱啱食車仔麵喎。」佢補咗句。

「嗯。」

雖然佢話自己食燒味，可以話係認咗一半，但同樣地以佢嘅身份嚟講，佢好有可能講大話。

我行返落去我嗰班到問曬所有女仔，一係就話唔知，一係就話啊晴食譚仔，佢哋內部好明顯夾過曬。

有可能真係啊澄買，但都有可能係啊澄講大話，而啊晴夾埋其他女仔水我。

我返到最後一排，托住下巴，進入思考模式。

「凡走過必留下痕跡」

痕跡如果用五感嚟分，即係視、聽、嗅、味同觸。



撇除冇可能用到嘅聽、味同觸，就淨返視同嗅。

視覺同嗅覺？車仔麵同譚仔會留下嘅痕跡？

兩個都係屬於粉麵類，但佢哋有咩共通點？

我沉思咗一陣，諗起細個食粉麵嘅畫面。

…

..

.



「嘩，啊媽你整啲餐蛋麵好正！」我喺到讚我啊媽。

「知喇！」佢拎住張包紙巾行過嚟：「小心啲食啦，食到成身都係。」

「係咩？」

我耷低頭望，原來啲湯彈曬落我件衫到。

當時我著住白色背心，所以可以好明顯見到件衫上面有一點點嘅肉色湯跡。

…

..

.