我在英倫身兼數職的日子: 第六章： 敗走英倫重新出發， 讓我走得更遠
無風無浪既日子好快過完， 上司對我既要求同效率愈來愈高， 在香港身經百戰既效率下都感到有壓力， 加上份糧入不敷支既情況下， 雖則無財政上既壓力但每月都負數既感覺不太好， 在呢短短幾個月期間都有搵工， 所謂來者不拒， 有得見就去見下工，儲下經驗值， 反正都係網上見工對我係零成本。 同香港一樣做緊一份工去搵另一份， 會比較多人搵，有本地工作經驗點都有說服力啲， 況且2020 年仲未有咁多香港人過嚟， 加上脫歐人才短缺， 雖然無話咩搶人才但真係可以日日都有工見。 當中全部interview都失敗， 大部分都過到去2nd round final round 先失敗， 我見我上司劍橋出身咁鬼勁， 那邊又多初創科研， 咁就劍指去劍橋工作啦， 所謂地靈人傑， 當地又多國際學生， 能夠致身世界五大既學府， 出入下都感到型過人， 一心要入劍橋做嘢既情況下曾經有兩次機會到final round, 都係去到臨埋門一腳波既情況下失敗告終， 我當時真係有啲失望， 係咪歧視呀…就係呢個時刻之前有個agent 又再打俾我， 同樣係北部城市既office, 不過今次係做散仔職位， 我心諗之前做呀頭都唔去見無理由做散仔去下話， 加上咁鬼遠點返工？ 當我姓黎？ 個agent 搵過我幾次， 我又唔識拒絕人， 加上當時滑鐵盧左兩次後失望情緒高漲， 想搵個機會比自己贏返信心，當羅多啲見工經驗都好，所以就用三個鐘揸車北上睇吓間公司咩料， 又睇吓請咗個咩呀頭做之前叫我in 那個位都好。 拿！來回六個鐘車程去見一份工， 誠意可加吧！結果係出人意表。
揸三個鐘真係唔野小， 揸得快要長時間集中精神會好累， 揸得慢真係天黑都未到， 喜歡揸車特登都會出去吹吹風既人， 相信試過長時期揸長途車返工後會討厭揸車，雖然我自大學起已經日日揸車返學， 經驗豐富，但我唔好車也唔鐘意揸車， 經過長途揸車既日子後，我就自此之後連任何賽車game, 小型go Kart 車什至碰碰車都不了， 好厭倦。
講返見工既過程好順利， 我終於知道之前agent 話我一定鐘意間公司culture, 原來呀頭都係香港人， 公司個事頭婆係台灣人， 平時工作都要同台灣分公司溝通， 所以工作要求都要識國語， 咁見完工我覺得感覺唔錯， 感覺個呀頭夾得埋， 香港人既上司， 工作環境，公司業務性質， 樣樣都無問題，加上現在份工比到我一種被歧視既感覺， 咁我有得跳槽又有得圍爐下洗滌下心靈都係一種辦法， 最緊要同台灣交手又唔係同偉大祖國， 咁同我宗旨無扺觸呀， 雖然公司係好遠， 但大老細比我hybrid 一星期返三日， 又比我任開年薪， 仲話有analyst 同engineer 位任我選黎做， 咁誠意拳拳我就當仁不讓啦， 從此我就轉戰北部戰區！