萬金油與孺子牛（第二季連載中）: 只為守卿入局中
「因為係你迫嘅。原本你哋各自一個山頭隔空鬥法，我只需要做好我幕後軍師嘅職責，呢度搵袋一份，內地搵袋一份。你知唔知，我搵嘅係Donald嘅五倍！但你哋兩個一齊咗之後就打亂晒我所有計劃，Kerry為咗證明俾你睇，佢會亂咁嚟，完全唔按牌理咁出牌。你都一樣，不停喺公司左搵右搵。我自問本身安安份份、啲嘢都係收收埋埋咁做，偏偏俾你哋兩個搞到啲計劃亂晒！」
他睥向我，繼續說：「你以為我係為咗個位？唔係，我想要嘅係一個我控制到嘅環境…」
他說到這裏忽然有一大班人在我們前後左右把它們包圍，包括省級政府官員、公安、香港便衣警察。
「陳國明先生，我們已經有證據將涉案的深圳市兩位官員扣留調查並控罪。目前已經有充足的人證和物證，控告你商業欺詐、合同欺詐等多項罪名，另外涉及港澳居民跨境犯罪、以及跨境使錢罪，正式拘捕你。」他們向他展示證件，以及在胸前的錄影機。
「我地喺香港商業罪案調查科，陳國明先生，你涉嫌觸犯洗黑錢罪及欺詐罪，由於涉及跨境犯罪，我哋會連同內地公安以及國際刑警配合進行調查。唔係是必要你講，但係你所講嘅將會成為呈堂證供。」並他們為Ben上了鎖但沒有馬上帶走。
「你想要一個你控制到嘅環境，你可以繼續犯法，我有冇講錯？」是Kerry，還有Rachel在她身邊。
「林泳昕？」Ben看到Kerry非常之震驚：「點解…」
「你真係以為權鬥嘅嘢我交曬比你，我就完全唔理？」Kerry眼神堅定：「原本都以為你係Donald嘅朋友應該幾可靠，咁係因為你自己露出馬腳，先會令我懷疑你。」
「你係幾時發現㗎？…」Ben有點心虛。
「喺日本嘅時候。發現你密謀做緊個局，想借我隻手一次過收網。但當我真正調查你個局嘅所有連帶資料，基本上就肯定左我之前嘅發現，係正確嘅。你嘅目標唔係坐上COO，而係想趕走我同Michael，令到你嘅環境同計劃變得可控。你無盡嘅野心、對錢同埋做局掌握力嘅強烈渴求，出賣咗你。你最厲害嘅位就係連Donald之前一直都唔知，因為你喺香港同埋英國將自己嘅名聲打理得好好，更何況你喺內地嘅秘密勾檔知道嘅人只有佢哋，你根本唔怕Donald會知。」
想不到Kerry一早已經知。這樣說，分分鐘由她跟我說分手的那句開始，已經是Kerry佈的局，因為她在日本公司那件事已經發現了Ben的線眼。
「好一個林泳昕！…我以為我可以贏到商界嘅魔王，結果都係螳螂捕蟬，黃雀在後。原來你先係最恐怖嗰個…」Ben哥看到身邊那些省級政府官員、公安、香港便衣警察，雙腳攤軟在地上，仰天苦笑。他旁邊的三位合謀，也和他一併被帶走調查。
我看着Kerry，擺出一副難以置信的欣賞樣子，沒有馬上詢問她，反而轉個頭問 Rachel：「你又會喺度嘅？」
「我車Kerry上黎嘅。佢琴日睇到你個表情，覺得你會做嘢，所以佢跟埋嚟，順便叫我搵幫手。」她指的幫手就是那些政府人員和公安。
「林泳昕？」我走近Kerry，耐人尋味地望向她：「所以由日本開始，都係局…」
她滿意地笑了：「點呀孫總監？我做局能力還好嗎？」
「你一個人打豺狼，你話，你能力高唔高？」我不禁慨嘆，她果然是「不鳴則已一鳴驚人」。
我又問：「咁我後面差啲破壞咗你嘅計劃…係咪你計劃嘅一部份？」
她偷偷笑了。看來這個局她的部署真的很完美，因為她非常了解我的性格，還利用我的性格和對她的愛，讓Ben徹底放下戒心，亦以為我已經沒有籌碼，他是穩操勝券。
「所以其實你一直都有留意阿Ben用嘅手段、佢d線人、甚至係佢會點樣出手……睇嚟你好早開始已經收集佢嘅證據，先可以收網收得咁準成。」我不禁慨嘆這部人肉電腦，算得比我準。如果她是那麼仔細，看怕Donald和我的佈局，其實她一直也看通看透。
只是明明她是為了保護我的位置才狠心和我劃清界線，偏偏她對我性格、和我對她的愛，那種精準的計算、拿捏和判斷，冷酷又理性讓我有點毛骨悚然。這個女人，不簡單。
「你可以咁講～早幾個禮拜我哋已經交咗證據比公安同警察。其實，特別係你做咗COO之後，阿Ben嘅手段更加奇怪。不過你太忙啦，而且佢本身係我呢邊嘅軍師，確實我係會比較留意到佢。」她直言，但也拉住Rachel手臂說：「有部份功勞都係多得Rachel。省市政府嗰邊，係佢用人脈，加速搵到深圳市政府嗰兩個官員嘅受賄證據。」
Rachel沒有像平時一樣獵人般望向我，反而溫柔、欣賞地望向Kerry：「林泳昕，你係我呂梓晴遇過最強嘅對手～只係單人匹馬，內地冇人脈、冇支援底下，做到最強嘅拆局～由今日開始，你內地最強嘅後盾就係我。」但她看著Kerry這個曖昧的眼神，真的令我渾身發冷。她，是故意在我面前宣示主權。
Kerry似乎也有點受寵若驚望向她：「Rachel，你都係我遇到入面能力、資源同埋手段最強嘅女人～」整個氣氛耐人尋味得有點曖昧，令我不敢呼吸。
「點呀兩位女強人？我唔係太想做電燈膽炸喎。要唔要一齊食個飯？」我打破她們的氣氛。
「又好～」「Kerry你想食咩？不如你過嚟我別墅度食，你有咗BB要食得健康啲…」「Rachel你太客氣啦…」…好吧，我放棄介入她們，接受自己是個局外人吧！