萬金油與孺子牛（第二季連載中）: 驚魂方覺意纏綿
晚上我再次拿走面膜和雪茄去露台，本想先抽後敷，我邊抽邊看看姨媽、舅父、Vincent和Tammy的進展。
「Michael哥，你真係覺得有用？」Tammy回覆我，我給她回：「試吓啦！佢同我一齊如果冇咗自己，更加證明我做得啱！我絕對唔會接受我自己會毀佢前途…」
「喂！」
「哇！嚇死我！」我被Kerry忽然的出現嚇一嚇：「你幾時出咗嚟架？冇聲嘅？」
「你覆小三果陣～」她耐人尋味地烘近我，令我眼神閃縮起來。
她坐在我身邊，我立刻脫下外套放在她肚子上：「你坐一陣好入返啦，唔好吹風啊…」我見她出了來，便把雪茄弄熄以免她吸入二手煙。
她一面留戀地望向我：「孫家弘～你呢排成日出黎敷mask，對住個月亮都唔望我…」
「唔係啊…你同bb唔可以食二手煙啊…」我也留戀地望向她。
「我同bb…都唔想再情緒化…」她認真烘近我，似乎別有暗示。我不知道如何回應她，便笑笑說：「有d大風…Kerry你返入去先，我食多支就…」
「孫家弘！」Kerry拉住我，她溫柔又憐惜地對我說：「你知唔知你好傻呀？」
我坐回椅上，她握住我手：「Michael，你個人對人太溫柔啦，咁你自己呢？你對你自己，可唔可以都溫柔d？」
她這句，猶如當頭棒喝。
我和她對望，仿佛從她眼神中看到她可能已經知道我是故意叫他們講我壞話。Kerry想我為自己著想、為自己爭取，而不非總是大方、忍讓。Kerry她為了我，沒選擇拆穿我，而是順著我的局……
「我哋返入去啦，你吸引過個月亮～」我烘近她說。
她奸狡地望向我：「係真唔係啊？」
「我地個女凍啊！」我立刻拉住她回房間，並大搖大擺躺上床上，拍拍身邊的位置。Kerry小心地坐下，睥住我：「你就坐得舒服！而家26週，你個女已經成日踢我啦！」
「呢個禮拜個肚好似大咗唔少…我上網睇人哋話六個月之後會大得好快。」我溫柔地摸在Kerry 的肚皮上，忽然感受到一腳，我很驚喜望向Kerry：「佢聽到我同佢講嘢啊…」
「佢一定係知道佢個無賴爸爸，呢兩個月忙到都冇時間同佢講嘢～想一腳伸走你！」Kerry的頂級解讀讓我投降。
我烘近肚皮說：「bb、bb，我係你爸爸啊～你媽媽係個鐵娘子，你嚟緊呢幾個月要乖啲，唔好搞到你媽媽唔舒服，知唔知呀？」我把耳朵貼近肚皮，「她」居然又踢了我一下。我感到非常興奮和神奇，望向Kerry。
「傻佬黎架…」Kerry笑笑望向我、摸摸個頭的樣子，我倒是第一次見。
我烘近她鼻尖，寵溺地望向她：「老婆辛苦啦～」
「邊個係你老婆呀？」她害羞地別過臉。
「你唔係話…唔肯定唔好表白咩？」我故意把聲線壓得非常非常低。
「你仲記得嘅咩？咁你仲要我揀其他人？」她扭住我耳仔。
「啊Kerry姐…係我唔好…而家先記得…你扭得啱…」我把她另外一隻手放到我另外一邊耳珠上。
「扭你有咩用呀？轉個頭你咪又唔記得咗…」她輕推我額，補充：「我話你知呀，你搵返嚟幫你講嘢嗰四個臨記，我已經同佢哋講清楚你呢啲小動作對住我係起唔到作用！你搞到我要同阿爸阿媽解釋，唔准再有下次呀！」
我無法反駁：「知道Kerry姐～」
「你冇心裝載！」
「Kerry姐～～ 咁我真係覺得自己冇優點呀嘛…」我輕輕拉扯她的衫角撒嬌。
「你唔准再咁諗呀！」Kerry指着我帶點認真和警惕的感覺，我點點頭。
「要攬～」Kerry把我手繞住她胸下，拉近她。我貼近她擁著她，她忽然提起我手臂，在手腕附近位置狠狠咬了我一口。「Ouch…」
她得戚地望向我：「拿～代表你以後都係我㗎啦～」
「我又要咬…」我烘近她要咬她耳珠、頸窩，她害羞又痕癢地縮開、與我推拉：「喂呀！唔比～…」
「唔比？」……
「啊…」早上大概6點多，我胸痛又發作。之前我有些少痙攣性心絞痛不適，隨身藏着一小瓶藥，其實沒有告訴我父母，一來不希望他們擔心，二來就怕他們亂來……
「弘仔…老豆！孫國華！我哋個仔唔舒服啊！要唔要call Hanson…定我call Mandy…」Kerry因為被我嚇倒，不小心驚動了我剛起床的父母。但相信她也比我父母的行動嚇倒，特別是我媽這個驚慌失措的樣子。
「阿媽…我冇事啊…」他們都沒有給我說話的機會。「老婆老婆，冷靜啲，我哋帶佢返醫院check啦，我而家call 阿金…」「弘仔你點啊？坐高少少先…」他們兩個都在我床邊團團轉，Kerry坐在我床上握住我手。
「阿媽，少少嘢你唔好搞住uncle Hanson同Mandy姐姐啦，人哋有好多嘢忙㗎。特別係uncle Hanson，人哋而家係department Head嚟㗎…咳咳……」我制止我媽。
「咁Mandy姐姐呢？阿爸啊，人哋啱啱升咗做CE，你咩事都走去煩住人，咁點得㗎？」
我爸給我一個安靜手勢，又將手機調校擴音器：「早晨Dr Suen, Dr Hong。家弘，Mandy姐姐啊，點啊你？你爹哋話你心口唔舒服，持續咗幾耐啊？發作次數多唔多？之前有冇試過？拿我幫你留咗位，你哋過咗嚟先，我叫左Hanson返黎睇你。」
「麻煩晒你Mandy姐姐～」
「唔麻煩～一陣我都會過嚟睇吓你，你唔好講咁多嘢休息吓先。」「知道。」然後我爸重新接過電話。她們便帶上我和Kerry一起去他們工作的私家醫院。