萬金油與孺子牛（第二季連載中）: 霧鎖重樓情深處

「孫家弘…」我剛洗完澡、Kerry 在塗護膚品，邊說：「你頭先做咩同我阿媽講結婚會再俾多啲錢佢啊？一陣佢真係以為你要拎我出去公海賣啊…」
「人口販賣？…」我被逗笑了：「嘥咗喎～單憑你嘅實力一兩個月都搵到賣晒你啲器官嘅錢啦…」我用毛巾抹頭，正打算偷她的面膜。
她忽然認真望向我：「咁你頭先同我阿媽講我哋會結婚…你講真㗎？」面對她這個模樣，在我未摸清楚她到底想不想結婚之前，我不敢正面回答。

「你頭先話當禮金嘛，我咪…順着你意思講囉…」我看到Rachel和Ken少輪着傳訊息到她的手機，立刻瞬間轉移話題，我說笑地說：「更何況我有咁多情敵，排隊都未到我啦！拿我冇呷醋架，佢哋真係搵你…」我指一指她手機螢幕不停彈出來的訊息。
Kerry轉個頭正面望着我，我心裏有點怕她會看穿我。既怕她會覺得我是為了負責任而和她結婚，又怕她會覺得我不負責任，所以不想和她結婚。
她改為望向手機，平靜淡淡然地說：「都係嘅，我而家有咁多選擇，都唔一定要揀你啦，可？」
雖然聽到這裏心裏有點不好受，但我口中還是當是她在說笑地回應：「梗係啦Kerry姐～咁你慢慢揀，我去食支煙…」順便拿走一片面膜。

我拿著雪茄和面膜，去我的大露台位置，攤坐在椅上邊敷面膜邊抽雪茄。以前，我有龐大的人脈網絡、強勁的手腕手段，配上Kerry的工作能力和效率，我還可以抬起頭。但這件事令我和其他人瞬間明白，Kerry才是地表最強的手段、效率女王，連香港頭四公司世界集團大少爺、中國霸主山傲集團太子女也甘願為她送上資源、公開追求她，那我算什麼？我目前只是一個擁有一點點股份的高級打工人。就憑我比他們優先「搞大」Kerry的「肚子」嗎？這樣對Kerry公平嗎？





想到這裡，我決定直接致電Kerry的姨媽和舅父，跟他們說Kerry目前有兩個千億集團的追求者，只係手一揮已經是幾百萬的禮物。如果單憑我和Kerry肚子的意外，令Kerry不能選擇其他人，我會過意不去。希望他們間接叫Kerry放棄我。聽起來我像一個渣男，但Kerry的舞台，不應該只是這裡、更加不應該要照顧小朋友，她是一個非常有潛能的人才，比我更強的人才。
無論是Ken少還是Rachel，他們都擁有更豐富的資源，可以讓Kerry飛得更高。我告訴他們，如果Kerry和他們願意，我會幫忙照顧小朋友，所有費用我負責。

所以我原本確實有1秒想求婚，但現在我甚至已經告訴了Tammy和Vincent，叫他們盡量在Kerry面前說我的壞話。我決定了，要幫Kerry開放這兩個選擇。

「孫家弘！你可唔可以話我知，你最近做咩啊？」
我和山頭的其他主管吃午飯，Kerry忽然殺上來走入我們的箱房。他們原本還在開玩笑，看到Kerry姐，表情立刻嚴肅認真。
「Kerry姐，做咩咁問呢？」我最近只是減了少少熱情，但我沒有刻意遠離她、亦沒有刻意說反話，因為我知道以她的聰明用這些方法沒有用，我只可以溫水煮蛙。
Kerry姐銳利的眼神望向其他主管，他們立刻說：「我哋返公司做嘢先…」「Michael多謝你餐飯！我哋返去先…」我點點頭，Kerry進來並把門關好。





她緊張地問：「你係咪講過啲咩啊？點解我姨媽同舅父無啦啦對你印象咁差，仲叫我阿媽勸我同你分手？仲有，你知唔知你個好兄弟Vincent，我嗰次喺茶水間嗰度聽到佢同Tammy講你壞話啊…」他們的做法都很聰明，這樣就不會懷疑到我頭上。
「點算啊？特別係你好兄弟呀！你唔係話佢好可信嘅咩？點解佢話你背住我出面有第二個女人？佢無啦啦做咩要做啲咁嘅嘢唱衰你？都唔知佢性格。」Kerry居然完全不在乎他們說我的內容？

「你唔係應該問我，做咩背住你出面有第二個女人咩？…」我試探性地問，但她似乎完全不在意：「死啦，我姨媽同舅父就嚟返香港，佢哋會唔會虐待你㗎？…我唔可以俾佢哋喺英國係咁洗我阿爸阿媽腦…」
「林泳昕…」我打斷她：「你重點係咪錯咗？」
她忽然眼神有點奇怪，望向我：「咁…你而家係咪想我問你，點解…你要搵第二個女人啊？」
我看到她不開心，我不敢回答她，怕我也會露餡。

「咁…可能我人品唔好呢？」我不敢望向她，故意再斟一杯茶分散大家注意力。





她強忍淚水，低聲說：「點解又要推開我啊……」
她含淚跑開了。