「師生戀、同性戀」15歲果年，我鍾意咗一個唔應該鍾意嘅人: 第一章

「歡迎大家參加攝影學會，我係你哋嘅負責老師Mr Lam，同時都會教你哋唔同嘅攝影技巧，嚟緊請多多指教。」

講緊嘢嘅係40幾歲嘅阿叔，佢係我form 1嘅時候入嚟我間學校度教，已經教咗三年，今年第四年。

佢form 1教過我一年physics 之後就冇再教過我。

就係升中四嘅幾個月前，我咁啱經過Lab 就俾佢捉咗我入嚟攝影學會。

幾個月前…



「喂！程穎琳！唔好走住！」林sir突然之間喺我後面叫停我。

「咩事呀林sir?」我停咗喺度望住後面。

「我之前見你幫學校活動影嗰啲相都影得好靚吖！填紙過嚟參加我個攝影學會，幫我帶下啲低form啦！」佢拍一拍我個膊頭。

我呆咗一陣…

「吓？唔好搞我。」我理都唔理佢就擰轉身好快咁行。



「程穎琳！你同我企喺度！」林sir勁大聲咁講。

「我唔理你，總之聽日我要見到你張入會申請紙擺係我簿架入邊。」佢講完之後就勁瀟灑咁走咗。

咩料呀…

「阿sir！你唔可以咁夾硬嚟㗎喎！」我望住佢嘅背影大嗌。

林sir冇理到我就走咗…



就係咁，我俾人夾硬拉咗入嚟攝影學會。

「係呢個Day Camp開始之前，我哋分咗三組先，跟住再玩遊戲。」

「7-10個人一組，Let’s go！」林sir拍一拍手。

我隔離嘅黃洛雯指一指我同佢…

黃洛雯由我中一嘅時候已經同我同班，所以我哋一直都好friend 。

因為佢個名有個洛字，所以我成日好順口咁嗌佢「Lok」。

我望住佢，知道佢叫我同佢一組，所以就點一點頭。

「我哋求其入一組啦，佢哋都差唔多分好哂。」我望一望周圍。



「嗯。」我哋求其入咗一組。

「就嚟開學，你做哂功課未呀？」黃洛雯細細聲問我。

「未喎，你呢？」我漫不經心咁講。

「我一早做晒啦，你估我係你咩。」佢反一反白眼。

突然之間聽到後面有啲腳步聲，我同阿Lok同一時間擰轉頭。