「師生戀、同性戀」15歲果年，我鍾意咗一個唔應該鍾意嘅人: 第二章

一擰轉頭，見到一個好後生嘅女仔。

佢啲頭髮啡啡地，長過膊頭少少，眼大大，着住一件白色T恤同埋藍色牛仔褲。

佢見到我望住佢，佢又望一望我。

我哋四目相投，佢微笑咗一下，然後同我講咗句「Hello～」

當我疑惑緊佢究竟係邊個嘅時候，佢行咗去林sir隔離。



「唔好意思呀，我遲咗少少～」佢同林sir點一點頭。

「唔緊要。」林sir笑一笑，然後望住我哋講…

「同大家介紹返，佢係新來嘅何老師，今年開始會同我一齊負責攝影學會嘅。」

「何老師，你介紹一下自己吖！」林sir望一望miss。

「好啊，冇問題～」



「大家好，我係何老師，你哋可以叫我Miss Ho，咁我就係教中文科嘅～」

「我有好多嘢都唔識㗎，所以嚟緊都要你哋教下我，多多指教～」佢笑住咁同我哋講。

「喂，呢個miss好似幾Nice咁喎～」Lok撞一撞我個膊頭。

「嗯，佢個樣睇落好後生。」我望住人群前面嘅miss。

「真啊，你話佢係學生都有人信，而且仲要幾靚女添！」Lok附和我。



「好，唔該晒何老師。」

「你哋呢班塞豆窿唔好見人新嚟就蝦人啊！俾我知道嘅話就放學留低同陪我改簿！」林sir指住我哋講。

「得啦！放心啦林sir！你估我哋係小學雞咩！」一個中六嘅師兄喺前面好大聲咁講。

「你知你哋㗎啦，曳到咩咁。」

「點都好啦…何老師不如你求其入一組同佢哋一齊玩，等你可以快啲同佢地熟絡下。」林sir望一望miss。

「好呀！」何老師望住已經分好咗嘅三組，諗咗一陣。

唔知點解…

我好好奇呢個咁後生嘅miss究竟會入邊一組。



會唔會…入我果組呢…

Miss向住我嗰組嘅方向行過嚟，然後坐咗喺我後面。

佢…佢真係揀咗我個組！

「好喇，咁我哋轉頭就會…」林sir好投入咁介紹緊轉頭我哋會玩啲咩活動。

呢個時候，我忍唔住坐後少少，去同miss吹吓水。

「Hello。」我同miss打個招呼。

「Hello～你叫咩名呀？」miss問我。



「程穎琳。」

「Miss，你教邊班㗎？」我細細聲咁問老師。

「我教4C呀～」佢笑住咁點一點頭。

「4C？」我諗咗一陣…

「4C咪我嗰班？！」我恍然大悟！

呢個時候，Lok都擰轉身望住我哋。

佢聽到我同miss講嘢，然之後好興奮咁問…

「即係miss你會教我哋中文呀？！」



「應該係喇～」miss一路笑一路講。

「正喎！有個咁後生嘅miss教我哋中文，點都好過上年個沈大嬸，日日淨係識講佢以前喺鄉下點耕田，你話係咪呀啊Ching！」Lok拍一拍我。

「屌…你唔好再提個阿嬸啦！」諗返起上年佢嘅垃圾教學，我就火都嚟。

「喂！你做咩喺老師面前講粗口啊！」Lok望一望我又望住老師咁講。

頂…係喎….

67…唔係學都未開就要去見訓導呀嘛…

「我唔知啊～我咩都聽唔到～」miss擰歪面咁講。



佢竟然唔罰我？！

「嘻嘻，冇事冇事。」我扮冇事發生過咁。

「係呢～miss你睇落真係好後生，你幾多歲啊？」我即刻轉移話題。