「師生戀、同性戀」15歲果年，我鍾意咗一個唔應該鍾意嘅人: 第四章

「就係我哋攝影學會嘅Chairperson 喇！恭喜晒！！」

「吓，唔係呀？」我真係呆撚咗。

咁大份禮…點好意思啊…

「我可唔可以唔要呢份禮物？」我細細聲咁問佢。

「唔可以。」佢好絕情咁答我。



「好！恭喜我哋嘅Chairperson ！」林sir又開始拍手。

我望一望企係我前面嘅Miss….

佢一路拍手一路望住我笑得好開心。

佢個笑容…

完全就係好似…



恥笑緊我咁！！

跟住我哋就放飯，返嚟玩埋下半場啲活動…好快就完咗呢一日day camp。

夜晚準備瞓之前，諗住望一陣電話。

「叮！」一個message 彈咗出嚟。

『林sir已新增你入攝影學會』



林sir
『謝謝大家分享了你們的快樂和照片！』

然後就send番今日啲相出嚟。

救命…佢句野真係好老土。

「叮！」

又嚟？

『林sir已新增xxxx xxxx』

林sir
『歡迎何老師加入👏👏👏』



哦～原來呢個係miss…

今日真係好攰，所以加完佢contact 之後就瞓著咗。
——————————————————————

時間過得好快，睜下眼已經開咗學兩個星期。

「呼，6點半…去7仔買個早餐先。」難得我今日冇遲到，仲早咗，梗係食個早餐先番學啦！

係7仔對面嘅馬路，我見到一個著住白色恤衫，黑色長裙嘅女仔。

佢行咗去個推住成車紙皮嘅婆婆隔離，講咗幾句就開始幫個阿婆推車上隔離條斜坡。

「晨早流流咁得閒幫阿婆推車？」我一路行一路細細聲咁講。



行到去對面

望住個女仔嘅背影

有啲熟口熟面…

呢個時候，個女仔笑住咁望一望個阿婆，我見到個女仔嘅側面…

咦？果個咪miss？

我加快腳步行上前，諗住同佢打聲招呼。

「噠！」



架車突然之間失去控制，一嘢向右飛！

miss嚇咗一嚇，所以就放開咗隻手，然後架車就高速向後滑走。

「啊！」miss自己都因為嚇親所以左腳kick右腳失去平衡咁向後仆。

我即刻踏前一步，左手攬住差啲向後仆低嘅miss，右手拉住衝緊落去嘅紙皮車。

「吱！拍。」架車好大聲咁吱咗一聲，啲紙皮跌哂落地。

「你有冇事呀？」我緊張咁望住miss。

我自己都俾呢一連串嘅事嚇親。

miss望一望我，然後咳咗一聲就企番好個人。



我都放開咗攬住佢嘅手

「冇…冇事…嚇親啫…」miss好似仲有啲驚魂未定咁講。