「師生戀、同性戀」15歲果年，我鍾意咗一個唔應該鍾意嘅人: 第三章

「你估下～」佢望住我講。

「嗯…」我沉思咗幾秒。「二十幾？」

「差唔多啦～我今年22歲。」佢細細聲咁講。

「吓？22歲？！」我預咗miss係好後生但係估唔到後生成咁。

「16，17，18，19，20，21，22…咁咪即係淨係大我七年？！」我數一數手指。





唔好問我點解升中四仲喺度數手指…

我數學好差…

22歲…咁咪即係佢一大學畢業就入嚟教囉！

「好喇～專心啲聽阿sir講嘢啦」佢指一指出面手舞足蹈嘅林sir。

可能上年嗰個中文老師實在太差，所以當我知道有一個好後生，好Nice嘅老師即將會教我嘅時候，我會開始有啲期待…





「咁多位！今日阿Sir我攞咗自己啲私伙珍藏俾大家影相！影完之後我哋會投票！影得最好嘅頭五名同學會有小禮物一份！而第一名就會有一份大禮物！」林sir勁亢奮咁同我哋講。

「不過大家小心啲呀！係影嘅時候千祈唔好撞跌佢哋呀！」佢指一指後面成堆Marvel 嘅figure。

「咁舊成員就可以用自己嘅攝影器材去影啦，新成員就可以用電話影住先！」

「好！比賽…開始！」林sir 揮一揮隻手。

點解會無啦啦變咗一個比賽㗎…





都唔知可以講咩好…

我攞咗我個Canon相機出嚟，行去Iron Man前面開始影相。

影影下我feel到有人去咗我右手邊，望一望隔離，原來miss 企咗喺度。

「影得幾靚咁喎～」miss望一望我相機張相。

「梗係啦！Professional 㗎嘛！」我好得戚咁講。

「得喇～知你勁喇～」miss 笑住咁講。

「你影唔影啊？我借部機俾你吖！」我遞咗部相機俾Miss。

「唔使喇～你影啦！」佢搖一搖頭。





「點解嘅？」我有啲疑惑咁問佢。

佢望一望周圍，見到林sir係好遠教緊其他學生影相…

「講個秘密俾你知吖！」佢行前左一步係我耳仔邊講。

「其實呢…我完全唔識影相…」佢有啲尷尬咁同我講。

「吓…你唔識影相但係點解要負責攝影學會嘅？」我真係10萬個問號喺我頭到飛出嚟。

「冇辦法啦…攝影學會上年走咗個老師，唔夠人，我又咁啱新入嚟做，學校咪派我過嚟負責囉！」miss有啲無奈咁講。

「所以我好多嘢都唔識，要從頭開始學，靠你哋教我㗎喇～」佢笑住咁拍一拍我膊頭。





「我睇吓其他人先！」跟住佢就走咗去望其他組員。

「喂！頭先同Miss傾咩傾到咁開心？」Lok突然間出現喺我隔離。

「冇呀，佢讚我影得靚咋嘛。」我望一望佢，然後開始影下一隻figure。

「你睇吓我呢張影成點？」Lok遞咗部相機係我面前。

「唔係好得喎師兄，你隻嘢偏向咗右邊喎。」我指住部相機。

「係咩？」佢攞返部相機嚟睇。

跟住我哋傾吓，影吓，好快就到咗投票嘅時間…

大概10分鐘之後，林sir已經點好晒所有票。





「好！票數喺頭五嘅同學分別係….」阿sir開始讀啲人名出嚟。

「而最高票數嘅就係…程穎琳同學！我哋俾啲掌聲佢啦！」林sir不停咁拍手。

嘩…我真係估唔到係我…

但係夠喇…

唔好再拍喇…

好尷尬呀！！！

「穎琳，你出一出嚟先！」林sir向着我招手。





又點呀大佬…

「我頭先咪話第一名會有份大禮物嘅～」佢笑住咁同我講，但係硬係覺得佢個笑容有啲陰濕…

我有種不祥嘅預感…

「你嘅大禮物就係….」佢提高左佢嘅聲線好興奮咁講。