校園雜記（少甜少愛）: Empat 軒軒
臨近農曆新年，通常都會有party嘅，但係由於校方認為今個月瓜咗太多人（明明只係得兩個），所以決定將嗰日變埋做新年假，有賺有蝕啦算係。不過多咗日假，我決定膽粗粗約軒軒出嚟玩。
“軒軒，嚟緊呢個假你得唔得閒出嚟玩？”“可以呀，你想去邊度玩？”“去某商場如何？嗰度都幾多嘢玩。”“可以呀，咁就約定啦。”
與此同時，我喺grp入面話：“我宣佈件事：大佬我有望出pool啦！”“咁突然？”“之前嗰個？”“有冇相”眾人難掩興奮，包括我，都好期待正式拍拖嗰一日呢。
喺嗰個禮拜，我已經冇咩心機上堂，每日淨係諗住一齊出去玩嗰日會發生啲咩事，同埋望住佢發呆，果然愛情會對人有好大影響呢。
過咗幾日，就係年卅。“你去到邊？”我message佢。“掟個彎就到，俾多兩分鐘我。”於是，我就喺巴士站附近等佢。突然，我feel到後面有個人攬住我，本能地跳開後一望，原來係軒軒。“你唔係未到嘅咩？”我有啲驚訝。“嘻嘻，我搭早一班車嚟嘅。你仲要等我嘅時候係咁傻笑，你估我唔知咩。”佢真係好得意嘅啫。
利申：軒軒視覺
我特登搭早一班車，喺巴士站等阿城。佢望落有啲焦急，又時不時傻笑，莫非佢鍾意我？應該唔會掛，我聽講雯雯鍾意佢，但佢已有鍾意嘅人，所以迫到雯雯自殺。算啦，即使我鍾意佢，同佢以普通朋友嘅相處方式已經好好了，畢竟佢對朋友甚至普通同學都幾善良大方。有些說話，講出嚟就已經係一場豪賭。
但唔知邊到嚟嘅勇氣，我決定喺佢後面攬住佢。佢嚇咗一跳，彈開咗，但一見到係我，佢又笑返，好得意。講咗兩句之後，我地一齊行返入商場。大家四圍行下吹下水，買咗杯bubble tea。“嘻嘻，多謝大佬！”佢鍾意人地喺呢啲場合叫佢大佬，少少虛榮又有少少可愛。只係諗到以後佢都會對其他女仔咁好，我就或多或少有啲失落……
跟住我地去咗溜冰，最主要係個溜冰場喺我城都幾出名下。我唔係好識溜，喺邊邊位勉強溜下咁樣。佢明明可以好似其他人咁，喺冰上起舞，但佢選擇俾我扶住，俾我慢慢習慣，莫非佢鍾意嘅係我？應該唔可能啦，靚過我身材好過我嘅人，喺學校有大把，都輪唔到我啦。
突然，個肚陣痛一下。“唔通嚟M？唔係聽日先咩？”我心諗。我仲以為應該冇嘢嘅時候，又再一次陣痛。我用隻手捂住個肚，輕輕揉搓。“你嚟M？”佢應該察覺到，輕聲問。我點點頭，“阿城，幫我攞下杯嘢飲，我坐下先。”
我坐低咗之後，佢又低聲問我：“你有冇M巾？”“冇……”我細細聲同佢講，“而家點算好啊咁，一定成條裙都係血跡啦。”“你唔好亂行，我去幫你買。”佢除低件外套俾我，快步行去最近嘅藥房。大概幾分鐘後，佢行返過嚟。“冇記錯日用係240/360。唔知你有幾多同啱邊隻牌子，所以有嘅都買咗。”“其實無謂買咁多啦，或多或少會哂咗喎。”“我驚你用唔啱嘛，唔怕啦又唔係咁貴。”佢仲跪低將佢件外套綁喺我條腰到，扶住我去廁所，睇嚟佢即使唔鍾意我都當我係關係好好嘅朋友呢。
出返嚟後，佢叫我坐低，隻手摸住我個肚，“有冇好啲？定係我去買暖貼？”“唔使啦，我唔係好痛，只係想坐一下而已。”佢就陪我坐咗喺商場嘅一角，一邊用手溫柔地揉我個肚，一邊同我吹水分散注意力。佢嘅手指好幼好長，幾好把玩，希望佢唔會介意啦，嘻嘻。
話咁快就已經傍晚啦，我地去咗海邊行下咁。望住天邊嘅一抹橙紅喺高樓之間退場，佢忽然話：“如果係拍住拖睇晚霞，你話幾幸福吖係咪啊。”本來我仲希望佢鍾意人係謠傳，好啦，而家佢本人證實佢已經心有所屬。“啊，都係嘅，哈哈。”
我小小尷尬咁覆。晚霞好靚，但我已無心再去欣賞，一諗到佢以後都會咁樣陪其他女仔，我就好唔捨得。好想定格時光，留存佢對我嘅溫柔……
“已經有啲夜，你想返屋企先定係留到跨年？”佢突然問我。“我應該就可以夜啲先返嘅，畢竟跨年嘛。”我話，但更多係想盡量同佢相處。“軒軒，你話如果喺陣間嘅煙花下表白，係咪好浪漫。”“的確，你想表白？我或者可以幫你呢。”咁突然？佢咁就鍾意咗人？
“不如我問你啦，你鍾意點樣嘅人？”我想知道，佢嘅標準答案係點樣嘅。“其實冇咩特別嘅諗法，最主要係忠誠，唔會背叛，私生活乾淨吧。如果份人心地好，起碼唔係好似我咁黑心就更好。同埋，係真係一生一世吧。”“咁你鍾意邊個？”
“佢靚唔靚呀？”我心如刀絞。“唔係話特別靚，但佢份人幾好。”好吧，我應該冇機會了吧。
“冇耐就煙花啦喎，你唔約個女仔出嚟？咁靚嘅環境，親身表白好似好啲咁。”我決定結束呢場痛苦嘅暗戀。“陣間你就知啦。”佢面上閃過一絲不易察覺嘅笑。我左望右望，都冇識嘅人。“我地學校嘅？”“嗯。”算啦，再諗只會越諗越難受……
“啾”“啪”一朵朵煙花喺天空盛開。“軒軒，”佢突然湊近，“我鍾意你。”“你唔係有鍾意嘅人啦咩？”我不解，唔通佢真係鍾意我。“冇講笑，鍾意嘅就係你嘛。”竟然，佢竟然鍾意我！發夢都唔敢諗嘅情節，竟然真真切切發生喺我身上！“我都鍾意你！”我激動咁話，衝入佢嘅懷裡，緊緊咁抱緊佢。我地就喺漫天煙火嘅見證下，正式喺埋一齊。
“城哥，新年快樂！打嚟有嘢搵我？”電話那頭響起阿白嘅聲音。“新年快樂，俾你睇啲嘢吖。”佢突然拖實我隻手，向佢曬命。“恭喜喎城哥，邊位有幸做大嫂呀？”“返嚟你咪知囉，嘿嘿。”
自從開始拍拖之後，喺假期我地每日都打電話，吹水。我嘅朋友相繼知道咗我拍拖，紛紛前嚟道賀，不過更多係八卦。而我地嘅新年假，就喺呢個熱戀嘅幸福時光之中度過咗。