是咁的，我無啦啦收到隻戒指: 十四

「龍與恩人？龍會唔會即係你？」狗卷提出呢個假設。

「照咁講，我應該知邊個係恩人。」我上網Search咗下南哥間士多。

Google Map下面有個電話，我打咗過去。

響咗陣，終於有人聽。

「係咪南哥？我係龍仔啊。」



「係，你係咪有新發現？」

「有啊，所以我打嚟想問你一樣十三年前發生嘅事。」

「十三年前嘅事？」佢笑咗笑：「咁耐之前嘅事，我未必記得，不過你都可以問咗先。」

「十三年前，我哋第一次見係喺邊？」

「嘩，我鬼記得邊間咩，間嘢汁咗未都唔知。」



「大概位置有冇啊？」

「冇記錯的話係喺西貢，嗰陣時我哋成班友去食飯，然後你同你啲Friend喺隔離枱。」

「真係西貢？」我想再Confirm一次。

「唔肯定，但最有可能係西貢。」

「咁好啦，得閒再搵你飲茶。」



「收到你。」

我Cut線，然後佢三個即刻圍咗埋嚟。

「有咩發現？」啊金問。

「我哋而家要去西貢。」我宣佈：「因為我恩人同我第一次見係喺西貢。」

「即走啦，時間無多。」啊聖拎電話出嚟撳咗撳：「Call咗的士，行出大馬路即有。」

我哋行出大馬路上車，好快就嚟到西貢碼頭。

西貢碼頭隔離幾條街全部都係食肆，我哋嘅任務就係問曬咁多間。

落車之後，我哋決定分頭行事，佢哋有咩發現再打比我。



我沿住條街逐間問，但佢哋唔係話唔可以透露，就係話幫襯佢就答我。

我幫襯咗幾間但佢哋都冇嘢比到我，所以我都冇再幫襯任何一間，問完冇就去下間。

食咗十幾廿次白果之後，我開始有少少頹。

電話響，係啊聖。

我聽咗個電話：「做咩？」

「有發現。」

我聽到呢到，即刻有返精神。



「邊到？」

佢講咗間餐廳名出嚟，我查到喺邊就即刻衝咗過去。