因為炸雞店一次意外，我變成了超級英雄。: 第二章 炸雞之神

眼前漆黑一片，周圍都好熱。我明明應該炸緊雞，點解我會泥左一撻唔知咩地方既？

呢個時候背後有把聲，聽落去似係老人家泥，佢同我講︰「麥佐治，你已經死左啦。」

我即刻轉身，大嗌︰「係邊個？快啲出泥。」

一團光係我眼前匯集一齊，慢慢砌成一個人形出泥。呢團光成為實體，變成左一個身型肥胖，滿頭白髮，仲有面戴黑眼鏡既老人家。

「你…你係邊個，呢度又係邊度？」





「我就係炸雞之神，你依家身處既係我為你創造既精神空間。」

「炸…炸雞之神？」我忍唔住笑左出聲。

「唔…睇泥你唔係幾信我喎。」

「咪玩啦，你望下你下面個肚腩先啦。」

我又摷下褲袋，發現身上既隨身物品都唔係度。





「仆街…唔通跌左？」

老伯望住我，又講︰「我已經同你講左，你依家身處既係我創造既精神空間，依家你既主體只不過係幻像，真實既你已經死左。」

「喂老伯你好啦喎，一直講埋啲莫名其妙既說話。」我行上前諗住捉起佢件衫，但當我伸手過去既時候，發現隻手居然可以穿過佢。

「點…點解會咁架。」

「我已經同你講左，你已經係一場意外入面喪生。」





「冇可能架，我頭先明明仲炸緊雞，點解會咁架，我點死架？」

「油爐爆炸，被炸死。」

我禁住額頭，的而且確炸雞之後既記憶完全記唔起泥，所以肥佬講既，唔通係事實？我真係已經死左？

「我唔要呀！我唔要死呀，我仲有好多野想做架！」

肥老伯又輕輕笑左下，道︰「我當然知道你好多野想做啦，而我可以令你起死回生。」

我望住老伯，擘大對眼，說︰「你真係可以令我起死回生？」

「冇錯，不過我都有條件。」

「你講呀，只要可以起死回生，咩條件我都肯。」





「好，咁我就單刀直入啦。頭先個場爆炸，令到「帕特修斯」復活左。」

「帕特修斯？」我重覆。

「冇錯，一隻兇殘既食肉怪物。」

「其實係當年炸雞出現之前曾發生過一件事，一隻叫「帕特修斯」既怪物係地球出現，個隻怪物以人為食糧，身體十分強壯，幾乎刀槍不入。後來牠泥到我所在既市鎮，當年我只係一個廚師，係森林採摘食材既時候遇到佢。當時佢想食左我，但好彩當時身上帶住包麵粉，我將麵粉灑向佢到，發現佢對麵粉有住強烈的反應，亦都係因為咁，我成功逃走左。」

「咁之後呢？」

「因為知道佢既弱點，我帶住幾個助手入去森林搵佢。終於比我地係森林入面既淡水湖搵到佢，我地向佢掟數以萬計既麵粉，佢因為痛苦而失足跌落水到，當佢從湖爬出泥既時候，身型亦腫脹左一倍。無幾耐之後就係我地面前死左。之後我地帶住帕特修斯既屍體返去餐廳，諗住將屍體燒毀既時候，發現屍體唔存在臭味，反而仲產生一種香味。於是我其中一個助手提出一個大膽既建議，將帕特修斯既屍體用油滾煮。就20分鐘既時間，帕特修斯既屍體就成為一道金黃鬆脆既肉。」

我吞了一啖口水，唔知比咩反應，呢個唔通就係炸雞既起源？





「呢件事甚少人知，後來我地用雞取代帕特修斯，製作出一款叫炸雞既食物。而岩岩復活既帕特修斯就係為左復仇而重生，如今既佢更強大，更兇惡。我需要你既力量。」

「我可以點做？」

「我會將我既力量賦予比你，當你接受呢份力量既時候，你就會起死回生，並且擁有超乎常人既力量。」

「好！我接受你既力量！」我毫不猶豫回答。

「咁好啦，我依家將我既力量托付比你，請你將帕特修斯徹底消滅啦。」

佢再次變成一團光，光開始進入我既身體，我感覺到有股前所未有既力量係我身體入面不斷膨脹。