因為炸雞店一次意外，我變成了超級英雄。: 第三章 重生

當我擘開雙眼既時候，眼前竟然出現一位天使。佢有對水汪汪既大眼睛、尖尖既下巴、有啲似後生時期既中森明菜，唔係講假。

佢見到我擘大雙眼，一聲不哼咁離我而去。點解！點解要走呀！留係度陪我呀！我既心情唔知係咪太過激動，個一下意識又突然斷片，眼前又變返漆黑一片。

唔知過左幾耐，我又感覺到眼睛比啲奇怪既光照住。我望向光既方向。首先係隻白手套，然後係一個大肚腩，藍色既口罩，黑色既眼鏡。

「炸雞之神？」我衝口而出。

佢閂左盞光，聽得出佢故意扮咳幾下。然後轉身同唔知邊個講野，話︰「病人清醒啦，麻煩你幫我拎…」我聽唔到佢之後講既野，亦都唔知佢究竟同緊邊個講野。





「呢度係邊度？」我問佢。

「呢度係新市鎮公立醫院。」佢回。

「點解我會係度？你又係邊個？炸雞之神呢？」

佢頓左一陣，靜係回答左我頭兩個問題，佢話︰「我係李醫生，你工作既炸雞店今朝發生工業意外，你係其中一個意外生還者。」

我摸摸後腦，皺起眉頭，講︰「點解我一啲記憶都冇既。」





李醫生用奇異既眼光望住我，又講︰「你…真係一啲記憶都冇？」

我點頭回應。腦入面又閃過炸雞之神既畫面，唔通個個只係一場夢？

李醫生繼續講︰「咁好啦麥生，我泥緊會安排你留院觀察一段時間。不過老實講，麥生你地竟然可以係個場意外生存落泥，真係奇蹟。」

「我地？」

「你唔係唯一既生還者。」





佢講完呢句就走左，而我望住個白色天花板，頭又開始痛啦。