因為炸雞店一次意外，我變成了超級英雄。: 第十四章 傾國傾城馬寶琳

條女托住我降落到一條暗巷入面，佢放我落地下，背脊即刻涼浸浸。唉，要放都唔好放係水氹呀，咁污糟。我心入面講。

佢扯開我個塊爛剩半邊既面具，望住我個樣，道︰「麥佐治？」

「乜我識你架咩小姐？」我笑住咁問佢。

佢除低面罩，揮灑出泥既汗珠如同陽光照落湖面時產生既波光，襯托住一副美麗既臉龐。

真無法想像，面罩入面竟然係一位靚女，水汪汪既大眼睛，高挑既鼻樑，櫻桃般既小嘴，巨乳，瘦腰，蘿突。





靜係睇佢副偈，細佐治都不禁微扯了半吋。嗚呀~諗起頭先比佢托住，真係上世修返泥既福份呀！

不過話時話，我好似唔識佢架喎，點解佢知我個名呢？唔通…我係某討論區比人起左底？而我唔知情？

「你係邊個？點解知道我個名？」我回歸嚴肅，問佢。

「你唔認得我？我係馬寶琳呀。」

「你係馬寶琳？」我擘大對眼，望住眼前既女人。





雖然我同馬寶琳唔係成日有偈傾，但我都唔係盲，我都見過佢。佢明明就係一個帶住副眼鏡，成面暗瘡，頭又多油既肥妹仔，點可以咁短時間就變哂樣？整容都冇可能啦！

「你係馬寶琳？你…你完全唔同左樣喎。」我單刀直入同佢講。

佢嘟起嘴，擰歪面，繑埋對手，講︰「唓…你以前夠好瘦，依家咪一樣大隻左，同埋靚…」佢從下至上咁望我，視線落到我塊面既時候突然面紅，又唔繼續講落去。

「靚？」

「哎呀，你好煩呀！企唔企到呀？」





我坐起身，轉下膊頭，郁下手腕，頭先既麻痺感已經冇咁嚴重。

「企到。」我勉強企返起身。

「企到咁我地快啲走，呢度唔安全。」

「唔得，我要捉住個條友，竟然掟會爆炸既炸雞，真係可惡呀。」我走向火災發生既方向。

佢禁住我膊頭，搖頭同我講︰「佢已經走左，你追唔到佢。同埋你想話比所有人知你既真實身份？」

我突然醒覺，係喎，我面具已經爛左啦。呢個時候身體唔知點解好勊，身體開始冇力，唔通頭先爆炸對我造成既傷害仲係度？

我跪係地下，依家我身體既情況，的確唔適宜留係度。

馬寶琳上前扶起我，我用苟延殘喘既聲線同佢講︰「好啦，咁先去你屋企啦。」





佢點頭，然後就扶我返去。