因為炸雞店一次意外，我變成了超級英雄。: 第十五章 周豈高

真係講你哋都唔信，我依家竟然係女仔屋企沖緊涼。個種女士洗髮水同沐浴露不斷侵入我既鼻哥窿，呢種煥然一新既氣味對小佐治真係一種難以忍受既誘惑。

再加上屋主竟然係變得超靚既馬寶琳，成件事仲癲過動漫情節，幾乎可以變H漫咁滯。

唔係唔係唔係，我唔可以比美色沖昏頭腦，我依家有使命在身，我係要消滅帕特修斯，我要冷靜啲先得…

閂左水龍頭，用寶琳比我既毛巾一邊照鏡一邊抹身。不過講真…難得我有眼前既身軀同靚樣，如果唔走去識女仔咪好浪費？或者，我可以一邊執行我既使命，一邊開始我既新生活啵…

我著起寶琳比我既衫褲，係大碼泥既，不過又啱啱好，比著係以前，應該鬆到入面打左幾多件底都輕易比人數到。





走出廁所，見馬寶琳著住件黑色小背心，一條麻甩佬短褲，係度睇日本既輕小說。個對白滑既手腳幾乎一覽無遺。唔通…佢係色誘緊我？

「啊，你終於出泥啦。」佢望住我，然後慢慢走過泥。

佢拉拉我件衫，又好似望雕塑咁四方八面打量我。而我亦都好似座雕像咁唔敢亂郁。

「都話啱你架啦，又唔信我。」

我摸摸後尾枕，只係比左個笑回應佢。





佢又行去梳化度，拎起個電視遙控，打開部電視。

佢拍拍隔離既空位，同我講︰「過泥坐啦。」

我又笑笑口，雖然都唔知自己笑乜，不過硬係覺得咁樣最自然。

坐係佢隔離，眼尾個兩對缽仔糕…啊，都唔係缽仔糕啦，可以話係蜜瓜添啦，真係好鬼死吸睛呀！

「今日晏晝百寧樓發生一宗縱火案。」電視入面既新聞女主播講既野令我注意力去返部電視度。縱火案？唔通就係頭先發生個單？





我望住部電視，果然係頭先個單嘢。

主播繼續講︰「涉事單位係百寧樓十五樓。消防發現單位內有兩具燒焦既屍體，初步指死者兩人為夫婦關係。而警方初步調查得出疑兇係兩死者既二十一歲兒子周豈高。」新聞貼出周豈高既大頭相。

而眼前貼出泥既周豈高，如果唔係佢貼出泥我都唔記得有呢個人存在。佢就係我個間炸雞店其中一個同事。

「喂喂…呢個周豈高…」我開聲同馬寶琳講。

「係呀，我地嗰個平時唔點講野既同事呀。」

紅魔竟然係佢，平時唔點講野，一做野就搵野炸我，仲要殺埋老豆老母。

周豈高，你到底係一個點樣既人。