【校園／愛情】戀上鄰家女孩（布甸篇）: 3. 開心分享的秘密

如是者，我哋三個沿住樓梯一直落到學校大門，自信滿面嘅家樂一馬當先咁行喺我同子瑜前面，子瑜喺佢裙袋度摷咗個銀包出嚟，捉住我手臂叫我幫佢拎住。 

「你幫我袋住吖，佢好重，放喺裙袋唔舒服。」 

咁既然而家係我有求於佢，幫佢拎少少野都係應該嘅，只不過我望住手上呢個布甸狗公仔嘅銀包，仲厚過我自己個銀包成倍有多，真係唔明啲女仔做咩要塞咁多野喺銀包裡面。 

「唔準偷睇㗎！」 

「知啦知啦。」雖然我好想研究吓一個女仔嘅銀包點解可以咁厚，但我都識得分寸嘅。當我呢頭夾硬將佢個銀包塞咗落我褲袋，嗰頭已經見佢兩三個小跳步就埋到家樂身邊，同佢竊竊私語唔知講緊啲咩。 





無幾耐之後，家樂同子瑜轉咗方向，向住平時食晏嗰堆餐廳嘅反方向行，我估應該呢個係子瑜嘅主意，但唔知有咩特別用意。 

跟住我哋嚟到一間茶餐廳門前，但一睇門口個裝潢就知道唔係普通港式餐廳咁簡單，內籠嘅擺設散發住文青格調，更加同傳統茶餐廳有天淵之別，裡面啲侍應仲要著晒襯衫西褲，我差啲以為入咗間fushion菜嘅餐廳。 

然後企喺門口負責招待嗰個TB打扮嘅侍應，就過嚟帶我哋入去搵位坐，佢嗰種禮貌嘅服務態度，真係唔使旨意可以喺傳統茶餐廳遇到。 

正當我暗地裡擔心，我究竟食唔食得起呢度最平嗰個餐嘅時候，突然一把悠揚悅耳而又熟悉嘅女仔聲出現，瞬間將我靈魂震懾住。 

「子瑜～你又會喺度咁啱嘅。」 





係曉琳！佢同埋其餘五個師兄加埋兩個師姐，坐咗喺由兩張四人枱合埋而成嘅八人長枱，呢刻我終於知點解我哋會嚟到呢度，當下我即刻四圍張望邊度有鏡，俾我執執個髮型。 

「係呀，陳佑男話請我食，所以我先嚟咋，你唔使理我哋㗎，專心繼續傾喇。」恤好髮之後，我不由自主偷望曉琳一眼，佢坐咗喺最外圍，與此同時我發現，坐喺曉琳隔離個師兄用眼角偷偷地𥄫緊子瑜。 

喂等陣先！？黃子瑜，我幾時有應承請你食晏啊！？你係咪想食到我窮，等我冇錢埋單當眾出醜。 

結果，我、子瑜同家樂三個人坐嘅位置，大概同曉琳相隔咗兩張枱嘅距離，唔算話太遠。雖然呢間茶餐廳個格調走文青路線，但我見都有唔少白領喺度一邊食晏一邊傾工事，唔怪得曉琳班師兄姐會約埋響度食晏。 

「我揀好喇，你哋快啲揀嘢食啦，我好肚餓啊。」子瑜而家坐喺卡位嘅最入面。 





「好！我都揀好喇！」家樂就坐喺子瑜隔離。 

「吓！？咁快揀好？啱啱先坐低咋喎…」而我就坐喺子瑜對面，偶爾聽見曉琳嗰邊傳過嚟嘅歡笑聲，令到我無辦法集中到喺張餐牌上面。 

呢個時候，我感覺到我隻右腳俾人踢咗一吓。我抬高頭見到子瑜又嬲爆爆咁睥住我，嘴型貌似喺度講緊：「快啲，快啲！」 

佢每講一句，就起飛腳踢我一下，明明係女仔人家點解會咁粗魯㗎，我諗再唔快啲揀，會俾佢踢斷腳都似，原來呢度啲沙嗲牛肉麵同出面都係差唔多價錢，咁點解我哋之前唔識得過嚟食嘅… 

「唓！你兩個都抄我嗌沙嗲牛肉麵嘅。」落完單之後，子瑜一面講，一面將啲餐具浸喺杯熱水裡面。 

「黃子瑜食咩，我就跟住食咩。」鄒家樂你又幾厚面皮㗎喎，直認不諱。 

「嘻！咁下次我食個貴啲嘅餐先。」瞬眼間，子瑜已經有條不紊咁整理好晒啲餐具，將個熱水杯推喺餐枱中間俾我哋一陣用。 

「你有陳佑男請，就梗係可以食貴啲，但係我就冇咁嘅福份喇。」鄒家樂說道。 





「佢唔會請我㗎，人哋鍾意嘅係曉琳，係都請曉琳先喇，係咪呢？」當子瑜講到最尾嗰句「係咪呢」嗰陣，仲要專登奸笑咁望住我。 

喂！？黃子瑜你個衰妹究竟想點啊，做咩無端白事爆我個秘密出嚟！？