我睇見黃子瑜而家呢個得戚嘅表情,如果佢唔係女仔,我估我已經一早伸腳報仇咁踢返佢轉頭。 

「你想點啊黃子瑜?」我除咗感覺自己對耳仔已經㷫烚烚之外,我仲意識到自己聲線明顯有種怒氣,你唔想幫我咪算囉,點解仲要加多一腳踩落我度。 

「陳佑男!你聽我講,你唔好嬲住先,鄒家樂應承咗我一定唔會講出去。」黃子瑜向我哄前,嘗試解釋。 

「你諗吓先,原本剩係得我一個知道你鍾意曉琳,但係今年我同你唔同班,所以俾家樂知道對你嚟講都係一件好事,佢而家唔會因為唔知道你嘅心意,而捉錯用神講錯說話。」 

「何況我信得過家樂佢為人,我至會講俾佢知,我先唔會將你個秘密隨便同其他人講囉。」 





聽完黃子瑜一輪嘴嘅解釋之後,雖然我仲未完全理解到點解佢要咁做,但係霎時間我又諗唔到可以點樣反駁佢。 

只見鄒家樂一臉認真咁,雙手擺咗個打交叉動作,好似同緊我講佢一定會好好保守我個秘密,唔會爆出去。 

算數,而家唔知都知咗,如果我真係想追曾曉琳,又怕咩俾人知,假如我真係怕嘅話,暑假嗰陣我就唔會同子瑜講喇。 

子瑜同家樂見我唔出聲,我哋三個就你眼望我眼咁,默默咁靜待緊我哋碗沙嗲牛麵,當三碗香噴噴嘅沙嗲牛麵同步送到上枱之後,我哋都只係耷低頭默默咁食,全程無出過聲。 

我唔知道係咪心情唔好,影響到胃口都唔係咁好,但我見家樂早已經三扒兩撥就吞晒碗麵落肚,子瑜可能真係好肚餓,所以平時細食嘅佢都差唔多食完,而我就仲剩返半碗喺度。 





有時候子瑜眼珠會碌向上望住我,俾我見到又會即刻耷低頭避返開,唔知道佢係咪都察覺到自己講錯說話,但其實我又唔會真係嬲咗佢嘅,只係唔知講啲咩打圓場好,坐佢隔離嘅家樂見我哋兩個唔出聲,又好似唔敢插嘴。 

正當呢個時候,突然間有個穿住我哋學校件雪白色校裙嘅女仔坐咗埋我隔離,隨之而來青春少艾嘅仙氣,瞬間衝破咗我哋三個人築建而成嘅冰牆。 

「喂吔,你哋做咩咁靜㗎,因為無咗我喺度呢?」呢餐平靜嘅飯局,因為曉琳嘅亂入而添加返啲生氣,但我個心就開始噗咚噗咚咁亂跳。 

「曉琳,你唔係同緊佢哋傾緊正經野咩?」子瑜開口問道。 

「傾完好耐喇,佢哋喺度傾緊自己班會活動嚟緊去邊度玩好,我又唔同班插唔到嘴,咁我見你哋三個氣氛好似好凝重咁,於是我就同佢哋講聲,我想同我好姐妹聚下舊,就過咗嚟啦~」曉琳回應道。 





「你哋三個做咩咁靜啊?」曉琳續問。 

「嘻嘻,因為有人嬲咗我啊。」子瑜調皮地笑道。 

「邊個咁大膽嬲子瑜啊,鄒家樂肯定唔敢,係咪你呀?陳佑男?」曉琳你講還講,都唔使一野搣落我手臂度㗎,不過雖然係痛,但又幾舒服…我意思係個心當堂順暢咗… 

「無啊,我邊敢嬲子瑜,佢嬲我就有。」曉琳我唔介意你搣多我幾下㗎。 

「喂,你做咩唔食埋啲牛肉啊?」曉琳望住我剩返半碗嘅沙嗲牛麵,雙眼好似發光咁,但轉個頭又哄埋去子瑜度,壓低聲線繼續講。 

「黃子瑜我話你知,佢哋啊,頭先個個唔係嗌焗豬扒飯就係忌廉意粉呢啲貴野,但係我同佢哋第一次食飯,又廢事俾佢哋覺得我好窮,所以唯有跟住佢哋嗌,其實我都好想食沙嗲牛肉麵㗎,而家我好掛住上年同你哋一齊喺茶餐廳食晏嘅日子。」 

曉琳越講越嬌嗲,每個發音都好似五線譜上面嘅音樂符號咁,治癒緊我個脆弱心靈。

正當我沉醉緊喺旋律之際,黃子瑜忽然間輕輕踢咗我一腳,望住我碗牛肉麵打咗個眼色。
 





「曉琳,你唔介意嘅可以叫個傻仔分俾你食啊。」電光火石之間我會意到黃子瑜嘅用意,即刻用支叉簎起一塊牛肉,準備就緒。 

「哦係啊...好好味㗎呢間茶餐廳啲沙嗲牛肉。」我將支叉柄慢慢咁轉向遞俾曉琳,陳佑男你千祈唔好手震啊。 

「好吖,我唔介意啊。」曉琳好爽快咁接過我支叉,將我塊牛肉放咗入嘴裡面慢慢咀嚼。 

「好好味啊,多謝你,我要跟佢哋走喇,byebye~」就係咁,我望住曉琳帶住滿足嘅表情,離開咗我哋個座位,跟埋班師兄師姐去埋單,但我內心甜絲絲嘅感覺仍然猶在。 

當我擰返轉頭嗰陣,我見家樂已經笑到烚熟狗頭咁,黃子瑜又一腳伸落我度。 

「啊!痛!」使唔使咁大力啊你個死女包,啊唔得,唔可以嬲佢… 

雖然子瑜然又對住我擺起嗰副嬲爆爆嘅表情,但同時我睇得出佢喺度強忍住笑意。 
已有 0 人追稿