【校園／愛情】戀上鄰家女孩（布甸篇）: 11. 朱古力味無埞企

曉琳語出驚人之後，過咗幾秒我哋四個人好似俾導演定咗格咁，依然企定定喺度，只係眼仔碌碌咁，互相你眼望我眼。 

我最先望向家樂，佢似乎望住我隻手拎住嗰份提拉米蘇望到呆咗，咁嘅情況底下我唔敢望向曉琳個方向，我將視線慢慢轉移向子瑜方向，同時間佢眼神又咁啱聚焦落我度，我哋兩個目光交會嘅一瞬間，但見佢茫茫然咁擰返轉面，避開咗我。 

「欸…」呢刻我想搵啲說話打圓場，但唔通當住大家面講，其實個提拉米蘇係曉琳買，唔係我買，咁樣我又怕搞到曉琳無癮，而且我又唔知佢腦裡面打緊咩鬼主意。 

「啊…」突然間曉琳一聲慘叫，我哋四個眼球不約而同咁聚焦落同一個方向，目擊住一宗慘案發生。 

原本曉琳頭先單手捧住嗰舊朱古力布甸燒，如今只係剩返隻空寥寥嘅紙碟，因為舊布甸燒再次完美著陸咗…喺地下，散到一地都係… 





我忽然間諗到，曉琳你係有鋪癮鍾意跌嘢落地㗎喎，呢單已經係我已知嘅第二宗命案… 

但係而家唔係我思考呢啲無聊野嘅時候，因為曉琳即刻鬆開咗我隻手，一個人踎低咗，注視住地下嗰舊散開咗嘅布甸燒，見佢仲要伸手好似想執返起佢。 

喂唔可以㗎，千祈唔好信嗰啲咩食物跌咗落地，三秒內執返起可以繼續食嘅呃人說話。 

「陳佑男！」呢個時候子瑜細細聲喝令我，仲喺裙袋拎咗包紙巾遞俾我。 

係喎，點解我會連番喺度諗埋晒啲無聊野，而忘記咗呢刻我最應該要做嘅事係咩。 





「曉琳…我幫你執啊，我呢度有紙巾啊。」我摀低身，搶喺曉琳想徒手執返起舊布甸之前，極速抽咗張紙巾出嚟，再接過曉琳手上面隻空碟，用紙巾將呢舊可憐嘅布甸燒殘骸包好，放喺隻碟度。 

與此同時，子瑜都走咗去曉琳嘅另一邊，踎低身扶返起曉琳，喺度安慰緊佢。呢刻我先留意到曉琳雙眼已經紅腫腫。唉…明明前一秒鐘最興奮嘅人係佢，呢一刻最傷心嘅人又係佢。 

「嗚嗚…我個布甸啊…」女仔真係話喊就喊，但我今次醒水，識得即刻再抽多張紙巾，攤開埋先再遞俾子瑜，等子瑜幫曉琳抹走眼角嘅淚珠。 

「傻豬，我哋仲有個提拉米蘇吖嘛。」子瑜安慰地說道。 

「嗰個係買俾你㗎…」點知曉琳越喊越犀利。 





「陳佑男買嘅，我哋咪分咗佢嚟食。」子瑜笑道，但係子瑜你真係誤會咗啦，你個布甸燒真係唔係我買，我買嗰個已經跌咗落地。 

「係我買㗎，因為你尋日送咗筒朱古力俾我，陳佑男佢只係揀味道。」曉琳終於講出咗個真相。 

「咁不如我哋返學校share食吖，始終同你一齊食開心啲。」轉眼間，曉琳啲眼淚好似已經消失得無影無蹤，原來女仔可以話唔喊就唔喊，但我都不得不佩服黃子瑜，兩三下就平伏返曉琳嘅情緒。 

就係咁，子瑜拖住曉琳隻手，行喺我同家樂前面，四個人兩前兩後咁慢慢行返學校。講真，頭先嗰場小意外，我同家樂兩個男仔真係成碌木咁唔識俾反應，家樂都仲可以話因為知我鍾意曉琳，而選擇唔去介入，留返俾我處理，但如果唔係子瑜好心幫我，我又識做啲咩呢？ 

一個因為睇錯戲院名，錯過咗同自己鍾意嘅女仔睇戲嘅機會，而另一個就見到自己鍾意嘅女仔唔開心，但唔識即時安慰，我哋兩個男仔而家都無厘神氣咁跟住兩個女仔後面。 

我望住前面兩個女仔，兩個都係由中一識到而家，一個已經亭亭玉立，變成好多高form師兄追求嘅目標，社交圈子越嚟越闊，另一個雖然咁多年都無咩點長高，但就保持到嗰份可愛，又有種成熟識照顧人嘅反差感。 

我哋四個人離開商場搭電梯嗰陣，我側頭望一望玻璃鏡反射嘅自己，撫心自問，追女仔呢家嘢，睇嚟仲有漫漫長路要行。