【校園／愛情】戀上鄰家女孩（布甸篇）: 12. 寂寞的提拉米蘇

子瑜同曉琳兩姐妹喺路上一直細聲講大聲笑，我都慣咗佢哋呢種相處方式，知道兩個女仔傾緊偈嘅時候，男仔無乜事都唔好行埋去插嘴，但我旁邊嘅家樂明顯就仲有啲失落，於是我就撩下佢傾偈。 

行吓行吓我哋好快就返到學校，望一望校門個大鐘，都差唔多四點半。 

「啊，我唔記得咗要去買紙。」返到嚟曉琳先醒起原本我哋出嚟嘅目的。 

「我哋出返去再買？」我提議，反正而家都係唔算好晏。 

「唔啦～聽日先再買啦，我要同子瑜一齊分享個布甸燒。」曉琳翹住子瑜手臂，成個身挨咗落子瑜度，佢哋兩個一高一矮，子瑜身型嬌滴滴，俾曉琳一挨落去，差啲失平衡。 





「我跌啦，我跌啦，曾曉琳！」子瑜呼叫救命。 

個畫面有啲搞笑，又有啲溫馨。 

就係咁，子瑜跟埋我哋返課室，直接行入最後排即係我同家樂個位坐低，子瑜同曉琳分別坐喺我同家樂前面，反正呢個鐘數都無老師會捉同學擅自闖入其他課室，而原先喺度傾緊壁報板班女仔亦都唔見晒縱影。 

不過當我攞個布甸燒出嚟嗰陣，先發現我哋都無紙碟匙羹，唔通要用手食咩？ 

「我落去小食部問姐姐借！」我靈機一觸，九秒九衝落去雨天操場個小食部，擰轉身先發現原來家樂都跟咗過嚟。 





「喂陳佑南...你跑得真係好快...完全追唔到你...」家樂喘晒氣咁。 

「你落嚟做咩？」我問。 

「同你一齊攞餐具啊...我喺上面對住兩個女仔...有啲odd。」家樂答。 

「唔使怕羞喎。」我拍拍家樂膊頭。 

與此同時，我客客氣氣咁同小食部姐姐成功借到隻紙碟。 





「匙羹就冇啦，叉就側邊自己攞啦！廢事你兩個男仔無叉用啊！」小食部姐姐咁mean嘅，但又俾你一語道破咗我同家樂啱先個窘境。 

不過算喇，我諗叉同匙羹都係咁用㗎啫，我就拎住隻碟，家樂就拎住兩支叉，餐具到手之後就極速衝返上課室，今次我故意放慢腳步等家樂可以跟得上我。 

我同家樂一返到課室，見到子瑜同曉琳已經轉咗位，而家孖公仔咁坐咗喺我個位度。嗯，無錯係啊，係兩個女仔坐咗喺同一張凳度，即係我張凳，明明隔離家樂個位都有多張凳，但係佢哋都係要黐埋一齊，曉琳捉住子瑜隻手背喺度欣賞緊。 

「有得食啦！」我喊道。 

結果我同家樂就分別坐咗喺自己個位嘅前面，再擰轉張凳對住兩位大小姐。 

「陳佑男，你睇吓子瑜隻手真係超滑。」曉琳捉住子瑜隻手遞喺我面前，仲要喺度係咁摸住子瑜手背，只見子瑜咬住唇咁傻笑。 

我當然唔敢直望，但眼角睄到子瑜手背嘅膚色又的確真係幾白，而且雖然係白但又唔係營養不良嗰種蒼白。不過就咁肉眼睇，其實曉琳同子瑜都係不相伯仲啫。 

之但係咁，鄒家樂都喺度㗎，曉琳你唔好當住佢面咁樣玩啦，於是乎我只可以扮聽唔到，默默咁同家樂一齊將個布甸燒翻轉落隻紙碟度，雖然有啲雞手鴨腳，但都總算成功著陸。 





「曉琳你隻手都好滑吖。」而家調返轉，變咗係子瑜捉住曉琳隻手猛咁摸，然後換轉曉琳喺度傻笑。 

「喂兩位大小姐，個布甸燒仲唔食就…凍㗎啦。」我見個布甸燒俾人冷落有啲可憐… 

「陳佑男你係咪搞笑啊？布甸燒不嬲都係凍㗎喇。」曉琳歡然一笑。 

「陳佑男！不如你摸吓，真係好滑㗎。」忽然間子瑜伸手捉住我隻左手，逼我摸曉琳手背。 

搞乜鬼！？ 

「喂吔！」曉琳急道。

正當曉琳想縮嗰刻，子瑜已經成功將我隻左手，搭喺曉琳手背上面…仲要順住手背順時針咁摸咗一個圈。 





好柔軟，幾乎無任何磨擦感，我手指完全唔敢俾力，但同時又唔想縮起，廢事破壞子瑜興致。而最後我發現曉琳竟然係全程眼仔碌碌咁望住我，四目相對之際我即刻縮開隻手，子瑜都無再用力，由得我從佢手腕中掙脫。 

但黃子瑜你知唔知咁樣會搞到我同曉琳都好尷尬㗎。 

「唔得啊，陳佑男借你隻右手嚟。」話音剛落，曉琳已經迅雷不及掩耳咁，趁我仲未回神，捉住我隻右手，同時又捉住子瑜隻左手，將我隻手搭咗喺子瑜手背上面，又順時針咁摸咗一個圈。 

同樣都係好柔軟，完全感覺唔到半點皮膚粗糙感，我留意到子瑜又嘟起個嘴，但係佢眼神閃縮，全程避開我眼光。 

「…」家樂個樣好似已經放棄咗生命咁。 

「陳佑男我問你，你覺得我哋兩個隻手邊個滑啲啊？」曉琳擺起個得戚嘅表情，目光轉移落我度。 

究竟你兩位大小姐想點… 

直覺話俾我知，答邊個都好易中伏，而認真咁諗，根據頭先嘅觸感，的確子瑜同曉琳都係不相伯仲好難話邊個滑啲，但再諗深一層之後，我係咪應該要揀曉琳，我想追佢，咁我氹佢開心都係好理所當然。 





再一次內心交戰之下，我真係唔知俾咩反應好；而另一邊廂，寂莫嘅小布甸已經同鄒家樂相依為命緊… 

點揀好呢...