【校園／愛情】戀上鄰家女孩（布甸篇）: 13. 猜想不透的女孩

自此之後嘅嗰幾日，我都俾曉琳捉咗我去幫手整壁報板，有時候陪佢一齊去文具鋪揀顏色紙，有時候放學留低同埋班讀Viusal Arts嘅女仔一齊玩拼拼貼貼嘅遊戲，好在我過往三年都有幫手整過壁報板，男仔嚟講算係熟手技工，再加上我生得高，擒高擒低呢啲粗重工作更加不在話下，而呢幾日我都係同佢哋幾個女仔一齊食晏。 

曉琳平時其實都好忙，佢又要分時間去兼顧藍社幹事會嘅工作，又要留低幫手整壁報，雖然話就話開學初期功課測驗都唔會好多，但始終我哋升咗上嚟中四，學嘅嘢深咗，壓力大咗，縱使曉琳總係跳跳紥紥充滿活力咁，但始終都係一個女仔，點都會攰，見佢偶爾暗自唉聲嘆氣，我都唔忍心睇住佢咁辛苦。 

不過今日剩係得我同曉琳留喺度幫手。 

「曉琳啊，你抖吓先啦，cut紙呢啲繁複工序等我做喇。」 

「嗯…」曉琳直接僕咗喺我張枱度，而我就坐咗喺家樂個位度，雖然咁啱呢個角度我睇唔到佢個樣，但係佢條髮尾微微鬈曲嘅馬尾，就可以好清楚望到。 





枱面上面一張張嘅A4紙，印有我哋班咁多個同學嘅大頭相，而我嘅工作，就係要沿住條邊，小心翼翼咁將佢哋剪落嚟，呢度大大話話都有成四十個人頭，當我一分鐘剪到一張，唔偷懶唔㩒電話唔去廁所都要剪八個字。 

呢啲唔使藝術細胞嘅工作，就留返俾我做啦，曉琳你抖陣先喇，我今日實會幫你剪好晒佢哋。 

我拎起鄒家樂張相慢慢剪吓剪吓。哦？你問我鄒家樂去咗邊？唔使問啦，實係去咗子瑜嗰班房度幫佢手整壁報板，呢個死仔有異性無人性，自己班務都唔幫手，信唔信我剪晒你啲頭髮等你變光頭。 

啊唔係喎，不如將你張相，直接拎去釘喺子瑜班房個壁報板上面咪仲好，橫掂你咁想轉去文科班。 

剪吓一張，剪吓又一張，最後一張終於到曉琳，我當然要落足心機慢慢剪，特別係頭髮邊緣嗰啲位置，更加要金精火眼咁度好個位先至剪，已經熟能生巧嘅我，同自己講一分鐘內就要剪完一張，唯獨是曉琳呢張係不設時限嘅，何況佢僕低咗休息緊應該唔知我做緊乜。 





呼！終於搞掂，剪到條頸都有啲攰添，但係咁多張嚟講，曉琳呢張一定係最靚嘅，我要欣賞一下自己嘅作品先... 

五官標緻、鵝蛋臉，同埋長度齊眉嘅七分瀏海，唔係完全貼住額頭所以有種空氣感，不過最靚都係曉琳對大眼睛，加上佢又攣又長但又好自然嘅眼睫毛，我拎住張相望到幾乎入晒神，望耐咗又覺得佢個櫻桃小嘴同樣咁吸引。 

「陳佑男——」嘩嚇死我咩，我即刻放返低張相！ 

「你揀吖，我同子瑜邊個...啲啊...」 

嚇得我，原來只係曉琳發開口夢，佢依然仲僕咗喺我張枱度，面向住走廊窗口位置，忽然間我好奇，想企起身行過去望吓曉琳有無流緊口水。 





正當我想趷起身嗰下，我先發現原來走廊窗口有個女仔一直企咗響度，望緊我同曉琳，但當佢見到我有起身動作，就即刻耷低頭急急腳向住女廁方向行，不過我依然認得出個女仔就係子瑜。 

你做咩急急腳走咗去？我想嗌「黃子瑜你去邊啊？」，但又怕會嘈醒曉琳，所以嗌到喉嚨邊又夾硬吞返落肚，一直望住子瑜經過埋我哋課室度門，嗰剎那可以清楚咁望見佢白色校裙飄逸緊嘅身影，然後就消失喺我視線範圍之內。 

呢個時候，我又諗返起早幾日，俾曉琳逼我要答究竟係子瑜隻手滑啲，定係曉琳隻手滑啲個場景… 

「嗯...」曉琳緩緩擰轉面，但依然僕緊喺張枱度，雙眼睡懵懵咁望住我，呢刻我視線都停留咗喺佢面上。 

「你終於瞓醒啦？」始終，我都係覺得佢對大眼睛係最特別。 

「係呀，你剪好晒啦？」曉琳微微瞇埋眼，搖住頭咁用手輕輕捽眼。 

「嗯，剪好晒喇。」 

「咁乖。」曉琳嫣然一笑。 





之但係，佢個櫻桃小嘴都好吸引。