我放返底個手掣,行返出飯廳,見到黃子俊好乖咁幫佢家姐搬啲飯碗同筷子匙羹出嚟,熱焫焫嘅餸菜就由子瑜捧出嚟,我連忙搶前一個箭步幫手接過子瑜手上面嗰碟蝦醬炒通菜,然後再嚟多碟離遠都聞到香噴噴嘅土魷蒸肉餅。

「你行開啲先啦,呢個好熱唔使你拎。」子瑜揸住兩條濕毛巾𢭃住蒸肉餅個碟嘅兩邊,我即刻讓條路俾佢一口氣衝出飯廳,感覺上真係遲一秒放底都會焫親手,個畫面同抬炸彈無咩分別。

「呼…呼…」子瑜放低碟肉餅之後,立即縮起對手放喺嘴邊吹氣降溫。

「黃子瑜你有無焫親啊?」佢細佬挨喺子瑜側邊獻上關懷。

「無呀~開飯啦,坐低食飯。」子瑜溫柔地道。



黃子俊聽到家姐講話就即刻乖乖地坐低等開飯,我見枱面剩係裝咗兩碗飯,子瑜今日奇奇怪怪咁,唔知我因咩事又激嬲咗佢,我諗佢真係無預到我嗰份,咁我都無謂坐喺度無所事事,阻住人哋兩姐弟共晉晚餐。

「欸…我頭先都食咗啲嘢,我返去先啦咁…」

「咩呀
去邊啊你,呢碗飯係你㗎,我食餸得啦。」子瑜指住碗飯,示意我坐低一齊食。

「真係嘅?」於是乎我都乖乖地坐低等開飯。


「開飯~」兩姐弟齊聲叫道。



我哋三個圍住張簡樸圓枱,我同子瑜對住坐,黃子俊就俾我哋夾響中間,雖然枱面唔係咩珍饈佳餚,兩碟餸加兩碗白飯,連三餸一湯嘅標準都未到,但係子瑜堅持每晚都要煮家常便飯俾佢細佬食,廢事黃子俊求其煮個公仔麵連兩粒魚蛋都懶得加就當晚餐。

因為子瑜講過,佢好驚佢細佬好似佢咁唔識發育長高。講真啦,黃子俊有個咁好嘅家姐真係好幸福。而我呢…每個月總會有幾日過嚟打擾佢哋,黐吓餐,感受吓呢種小小嘅家庭溫暖。

「陳佑男,你話你頭先食咗嘢,係咪同黃子瑜兩個去食啊?」黃子俊冷不防地問道。

「欸?唔…」啊!!講到一半,突然間子瑜喺對面一腳踢落我度,仲要係踢中我啲腳趾,十指痛歸心啊,痛得我啊…

但又好似feel到有啲濕濕地…



係喎…子瑜對小白襪由今朝返學著到而家都仲未除,頭先喺廚房煮飯又搞到濕晒,如果枱頭啲飯餸唔係咁香,唔知會唔會聞到佢陣襪味呢…

「食緊飯唔好講嘢,知唔知?」子瑜以家姐口吻教訓佢細佬。

「唔係咁,咁點解黃子瑜你剩係食餸唔食飯啊?」但佢細佬總係識得喺「適當」嘅時候唔聽家姐說話。

「我減肥。」吓!?我眼角向上睄過去,見到子瑜已經將條圍裙除底,剩返條白色校裙,除咗上圍有少少繃緊,我真係心諗你邊處肥...

我頂,我又諗埋晒啲衰嘢,今日已經係第幾次?

但佢兩姐弟快問快答,我亦都好似理解到子瑜做咩要截住我唔俾我講落去,似乎佢唔想俾佢細佬知道我其實係同咗另一個女仔去掃街食嘢。

你個黃子瑜啊…雖然把口就講唔鍾意你細佬當我係男朋友,但其實又唔想破壞你細佬嘅幻想世界。

「咁一陣可唔可以借你男朋友教我做功課,今年啲數學好深我唔識。」



「咁點解你唔專心上堂啊?成日都要麻煩到人,要人哋幫你,人哋可能唔得閒睬你㗎。」雖則佢同緊佢細佬講嘢,但呢句聽起上嚟好似係講緊俾我聽…

「仲有啊,佢唔係我男!朋!友!」我含住啖飯望住子瑜正正經經咁管教緊佢細佬。

「唔…嚟啦黃子瑜,咁你都唔忍心睇住我成績差㗎嘛…係咪先?」

原本我仲諗住趁呢晚機會,想請子瑜幫我分析我同曉琳嘅戀情,但睇怕今晚都唔係一個好時機,況且我梗係覺得唔知點開口好,唯有聽日返學再算… 
已有 0 人追稿