【校園／愛情】戀上鄰家女孩（布甸篇）: 20. 旁觀者清者更清

隔日朝早，我返到課室見到差唔多半班同學堆晒喺我同家樂個位度，對住塊壁報板議論紛紛。梗係啦，尋日我同曉琳留低完成嘅傑作，仲要提早喺deadline前一日就搞掂，絕對係值得俾掌聲鼓勵嘅。

不過你班友咁樣塞住條路，我完全返唔到埋位坐低。

我四圍張望，最前排曉琳張枱依然空空如也，家樂貌似都未返到，斷估都係過咗去隔離班房。

呢個時候嗰幾個讀Visual Arts，即係同佢哋共事咗幾日嘅女仔迎面走埋嚟，但係表情八八卦卦咁，實唔方係好事。

「喂，陳佑男勁喎，咁快整好晒。」率先講嘢嘅係位戴圓框金絲眼鏡嘅女同學。





「你同曉琳尋日留到幾點鐘？」第二個講嘢嘅係個冬菇頭嘅女同學。

「欸…好似差唔多六點幾。」我回應。

「你就開心啦，同曉琳留到咁晏，你哋兩個有無…」最後嗰個女仔雙手拳頭碰拳頭，兩隻手指公輕輕咁互相觸碰咗兩下，言下之意即係問我同曉琳有無錫錫。

「黐線啦，你講咗去邊！」

之但係咁，最後嗰個女仔又的確喺呢三個女仔當中，樣貌係最好睇嘅嗰個。





「喂，你哋係咪已經一齊咗啫？」又輪返第一個戴圓框金絲眼鏡嘅女同學發問。

「無啊。」雖然我都想…

「咁你打算幾時同人哋一齊啊？」跟住到第二個冬菇頭女同學嘅發問環節。

「你幾個做乜鬼晨早流流就啄住我唔放啫？」曾經有一秒我都諗過索性喺佢哋面前否認呢段緋聞，免得佢哋繼續喺度窮追猛打，但我又唔想一口咬定我同曉琳之間無嘢，好矛盾。

「關心吓你啫，何況你兩個嘅關係已經變成咗公開嘅秘密啦，你自己睇吓，你哋兩張相釘埋一齊喎，而家全班都知道你兩個有嘢啦。」最後又輪到樣貌最好睇嘅女同學發言，而且仲俾佢一言驚醒夢中人。





吓咁即係話，原來班同學圍晒喺壁報板面前，其實係響度討論緊我同曉琳之間嘅關係，唔係掛？

我從人群罅隙當中，重新仔細注視住塊壁報板，我同曉琳張相唔單止佔據住棵生命之樹嘅正中間，甚至乎係成塊壁報板嘅正中位置。

原來唔止我一個人覺得我同曉琳有嘢，而家係明眼人都睇得出我哋之間存在住一種不尋常嘅關係，早就超越咗一般同學嘅界線，我潛意識越去迴避個事實，但個事實喺旁人眼中反而越清楚不過。

再加埋今朝一返到課室就俾呢幾個讀Visual Arts嘅女仔圍埋嚟問長問短，但問題係，咁我下一步應該點做？

直接表白？萬一如果只係我自作多情呢？咁咪即刻玩完？定係繼續保持住呢種關係，順其自然就會走埋一齊？

我回頭一望見曉琳依然未返到，而我個位又俾班同學圍住咗，我廢事行入人群當中製造花生，於是就索性孭埋個書包行出班房，喺走廊度呼吸下新鮮空氣，順便整理下思緒，思考下一陣撞到曉琳返課室嗰陣應該講咩開場白好…

「曉琳，早啊。」我轉身向住曉琳打招呼…

「早啊陳佑男～咦？佢哋圍住喺塊壁報板前面傾緊啲咩啊？」曉琳走前兩三個小跳步走到嚟我面前，挨喺我側邊望向課室裡面議論紛紛嘅同學，陣陣芳香體味迎面撲鼻，一股甜意隨即衝破心中鬱結…





「無啊，佢哋傾緊我哋係咪已經發展到情侶關係啊。」

「哦～咁咪話俾佢哋知我哋拍緊拖囉，又唔係啲咩唔見得光嘅秘密，我哋一齊返課室啦好唔好。」曉琳仲要主動翹住我手臂，神情嬌嗲，搞到我忍唔住想攬住佢，哄埋佢面珠墩度錫返啖…

鈴…鈴…鈴…

無情嘅校鐘聲將我嘅遐想徹底破滅，但呢個時候我聽到走廊樓梯方向有一陣踉踉蹌蹌嘅腳步聲，聲音漸漸由遠變近，我沿住聲音來源望過去，會唔會就係曉琳趕喺最後一分鐘衝返入課室呢？

好緊張啊…曉琳記得小心啲行唔好跌親啊…你知道你有時候笨手笨腳㗎啦。

如果你真係跌親嘅話，我一定會仆過嚟救你。

只可惜，迎面而來唔係曉琳，而係一個男仔嘅身影，雖然佢背住陽光，第一眼睇唔清楚佢個樣，但從佢個身影我都估到呢個男仔就係鄒家樂，手上面揸住個紙袋，裡面應該係個麵包，垂頭喪氣咁慢慢收步。