【校園／愛情】戀上鄰家女孩（布甸篇）: 25. 去吧！追尋你心中寶藏！
終於等到放學鐘聲響起，但今次唔剩止家樂一個人衝過去子瑜班房，而係我同佢鬥快跑過去。
「黃子瑜！！我擸晒我哋課室啲文具過嚟啊。」雖然始終都係我跑得快啲，但邊個贏又有乜所謂，最緊要係幫子瑜快啲整好塊壁報板去。
「唓～都係得一把鉸剪同一部釘書機。」子瑜回頭笑道。
佢哋班啲同學繼續當子瑜同我哋唔存在咁，特別係嗰幾個同子瑜嘈交嘅女仔，一見到我同家樂入嚟，就一臉不屑咁孭晒書包拉大隊走人。
所以諗返起我都算幸福，至少我哋班嗰幾個女仔今朝仲會問我仲有無嘢要幫手，大家都係讀Visual Arts，但人品真係差咗幾皮。
我見家樂一嚟到已經自動波咁默默將啲棉花黐喺啲綿羊上面，但我初嚟報到，始終都要等子瑜分配任務。
「子瑜～我有咩可以幫手啊？」
「你幫我剪啲草吖，要整埋塊綠洲喺嗰度。」子瑜遞咗堆綠色紙俾我，每張都mark好晒個形狀，呢啲唔使藝術天份嘅工作真係最適合我呢啲已經訓練有素嘅人。
計埋今年，大大話話我都累積咗四年功力，唔使十分鐘就完成子瑜交俾我嘅第一個任務。
「子瑜～搞掂啦。」
「咁快？係咪亂咁剪㗎咋？」子瑜有啲難以置信咁拎起我份成品驗屍咁驗，喂喂話晒你都有份培訓我㗎喎。
「嗯嗯，又剪得幾好喎，除咗呢度有少少過界之外...借把鉸剪嚟吖，好啦咁就靚仔晒，咁你幫我剪埋呢啲吖好唔好？
「OK！」就係咁，而家我同子瑜面對面對住坐，一齊著手處理埋枱面上堆大頭相，又係我嘅拿手好戲。
「今日做咩咁好死過嚟幫我啊？」
「想幫咪幫囉，使乜原因㗎，我哋以前不嬲都係一齊整㗎啦。」回想起過去三年總係有我同你仲有曉琳，之後加埋家樂一齊整壁報板，點講都好，我又真係唔忍心睇住你分咗班之後，要咁辛苦一個人攬晒啲嘢上身。
「哼！分明就係人哋請咗病假你先過嚟幫我咋嘛...」
我其實真係唔係咁諗...而由頭先Lunchtime到依家我都刻意一直都無提過曉琳病咗，但原來你都知道咗，咁即係家樂今朝已經講俾你知，我都無得再夾硬兜。
「喂吔！你差啲剪到佢啲頭髮啦，你唔好因為唔係你嗰班就唔認真剪先得㗎！」
「唔係啊子瑜，我好認真咁剪㗎，我當正係自己班咁做㗎。」
「哼！算你啦。」忽然間我靈光一閃，抬頭一望，果然子瑜而家嘟起個嘴又鼓起兩邊腮，我即刻調轉把鉸剪用個柄對準個金魚腮一嘢篤落去。
真係好可愛，一篤就扁咗...
然後子瑜擘大隻眼睥實我，死火喇...我好似估到佢想點報仇，但係我想避已經避唔切...
「嘩，痛！」你個衰妹咁大力踢埋嚟，你唔去踢波真係晒曬，球壇欠緊你一個交代...
「黃子瑜，幫你剪嘢都咁對我！嘩！痛到我啊！」
「嘻嘻，鬼叫你篤我在先啊？」
「喂我篤你都唔會痛嘅，但你踢落嚟我差啲腳都斷...」
我專登放低把鉸剪，抱住自己隻腳喺度捽佢啱先踢中我嗰個位，點知真係呃到子瑜趷起身行過嚟安慰我。
「喂吔你點啊？真係好痛啊？」子瑜慢慢行近過嚟，仲諗住佢會安慰我，不過見佢嘴角開始微微上揚忍唔到笑都估到唔方好嘢，但依家想避都唔知點避，我就好似俾人放咗喺砧板上面任人宰割，全身部位都有可能成為攻擊目標，結果佢一手摵落我大脾啲肉度，痛到我哇哇聲...
「哈哈，問你死未？」子瑜拍晒手掌咁勁興奮。
「你個黃子瑜，咪以為我唔敢還手啊！」唔教訓下佢真係唔得，但我又唔知點教訓佢好。
「係還手就快啦，第時你就唔會同我咁樣玩㗎啦。」你個衰妹窒我得咁快，但又好似有啲弦外之音。
正當我諗到點樣還手嗰陣，子瑜嘅表情瞬間360度急變，頭先仲好興奮雀躍嘅佢，而家好似個木頭人咁呆望住班房門口個方向：「曉琳...？」
吓咩曉琳？曉琳唔係請咗病假咩，點會出現喺度啊？
我即刻順住子瑜望向門口方向，門口外面真係企咗個著住白色校裙嘅女仔，高挑身材，亭亭玉立，唔係曉琳又會係邊個？佢手上面拎住杯珍珠奶茶，支飲管仲未拆開包裝紙，當我同佢目光對上之後，先發現佢兩隻眼已經紅晒眼泛淚光，咬住嘴唇，然後就轉身跑走，離開咗我嘅視線...
我真係諗都無諗過曉琳會突然間出現，霎時間我完全唔知應該俾咩反應，我再望向子瑜，見佢同樣表情呆滯，同頭先嘻嘻哈哈嘅模樣有好大落差，而且我唔知曉琳係由幾時開始企咗喺度，亦都唔知佢係咪見到我同子瑜喺度你一拳我一捶咁玩，更加唔知佢係咪聽到我同子瑜講嘅嘢，我真係唔敢再諗太多。
呢個時候子瑜挨近我細細聲但好認真咁同我講：「你唔追？你知道女仔咁樣跑咗去，其實係想個男仔去追返佢㗎可？」
我當然知道呢個時候如果我唔追出去，呢世都真係唔使旨意可以再追到佢...咪住等陣先！點解頭先子瑜講呢句嘅時候，把聲好似有啲感觸...
我諗返起尋日子瑜企咗喺走廊窗口度望住我同曉琳，跟住亦同樣好似曉琳咁急急腳離開咗我視線，唔通當時你係想我追出嚟…唔通你...
「黃子瑜你...？」去到呢刻，我已經唔敢去望子瑜而家個表情係點。
「我唔使你理我啊，仲快啲去追返佢？」
不過而家咁嘅情況仲有得俾我慢慢諗咩？我深呼吸一口氣，臨追出去之前我同子瑜細細聲講咗句：「對唔住啊...」
講真吖，我對腳俾你踢咗咁多年，雖然仲係會痛，但係都一早慣晒㗎啦。而呢句對唔住，你就當係...因為我真心好想好想幫你整埋塊壁報板去，只係我要出去追返曉琳，無辦法再留喺度。不過點都好，我知你唔會嬲我㗎可黃子瑜？因為你應承過我唔會再嬲我㗎嘛...