【校園／愛情】戀上鄰家女孩（布甸篇）: 26. 命運的最後考驗

我衝出子瑜班房門口之後，放眼望過去成條走廊人影都無隻，跟住我一口氣穿過成條走廊，隔離嗰幾個班房就仲有人喺度整緊壁報板，但我哋課室就空空如也半個人都無，只係祈求曉琳唔好匿咗入女廁。

我焦急盤算緊：「曉琳你去咗邊啊？」

去到走廊盡頭嗰時，我毫無頭緒之下，唯有調返轉頭重新行多次，確保自己真係無睇漏眼，當我去到自己課室門前，裡面依舊如是，但我依稀聽到有把柔弱嘅女仔喊聲，行入去就發現有個女仔踎咗喺我個位隔離喊緊。

「曉琳...」我慢慢行近，睇見曉琳拎住杯珍珠奶茶踎喺地下，耷低頭喊到個身一下下咁抽搐，我個心都乸住乸住，呢個時候唔係用嚟探究佢有無春光乍洩，重點係我要安慰返呢個女仔，仲要係我鍾意嘅女仔。

我即刻摸摸褲袋，好彩晏晝食飯嗰陣仲有張餐廳送嘅紙巾未用，我拎出嚟諗住遞俾曉琳，但覺得太過肉酸於是我又收返埋佢。點解上次喺布甸燒鋪前面，子瑜可以咁容易就氹返曉琳，但而家到我親自落馬嘅時候，我又無從入手咁。





「曉琳啊，唔好喊喇...」我索性學曉琳而家個姿勢，踎喺佢前面，雖然我表面上鎮靜，但其實心底裡完全係不知所措。

「你...過嚟做咩喎，你過返去搵子瑜啦...嗚嗚...」曉琳原本已經係一路索住鼻一路喊住咁講，點知講完之後喊得更加激動。其實頭先俾曉琳撞到嗰陣，從佢嘅反應我都估到九成關我同子瑜事，呢個禮拜佢雖然少咗試探我同子瑜嘅關係，但我估唔到曉琳會將呢樣嘢睇得咁重。

望見曉琳喊到水汪汪嘅大眼睛，淚流滿臉，楚楚可憐個樣，我又於心何忍再刺激佢…

「我應承你，我唔會返去搵子瑜，我留喺度陪你。」我幫曉琳拎開咗杯珍珠奶茶，將我褲袋僅餘嘅嗰張餐廳紙巾遞俾佢，張紙巾仲保留住我嘅餘溫。

「嗚嗚...你尋日...你尋日夠應承過我...應承我會留低...會繼續幫班女仔整...」





曉琳揸住我張紙巾喊到哭不成聲，連一句完整句子都要窒吓窒吓好辛苦先講到出嚟，但係我大概都明佢想講咩，簡單講就係尋日我應承咗佢，今日我會留低睇吓班女仔仲有咩需要幫手。

「我仲諗住...買杯珍珠奶茶...請返你飲...因為你尋日請我食章魚燒...點知返到嚟一個人都無...原來...原來你去咗搵子瑜...嗚嗚…」

唉...都係我惹嘅禍，其實我無唔記得佢講嘅嘢，我真係有問過仲使唔使幫手，但係佢哋都覺得塊壁報板已經搞掂好晒無嘢需要再加，我先過去搵子瑜，但最終我好衰唔衰俾曉琳撞到正一正，見到我同子瑜整緊壁報板，啊唔係，曉琳應該剩係見到我同子瑜兩個玩緊，雖然我無後悔去咗子瑜班房，但諗到呢度我又有啲自責...

「今日我有問過芯玲㗎，但佢都覺得無咩嘢要執，所以我先去咗幫子瑜咋...因為子瑜嗰班無人幫佢...」我都唔想曉琳一而再再而三咁誤會咗我同子瑜嘅關係。

「你剩係掛住幫子瑜，我今日唔喺度你就即刻去咗搵子瑜…你係咪好唔鍾意同我一齊整壁報板...」曉琳扁晒嘴咁望住我，一臉委屈咁，係男仔見到都想即刻攬實佢安慰返佢。





「唔係啊...點會唔鍾意啊，我想日日都可以同你一齊整壁報板，仲有呢，今日我俾Miss Chan罰，因為今朝早我以為你遲到，跟住點名嗰陣幫你作咗個大話，話你因為藍社嗰邊有啲嘢忙，所以先未返到課室，點知轉個頭Miss Chan就話你請咗病假，當場篤穿咗我個大話，仲罰我陣間五點鐘留堂。」

其實去到呢刻，我大概都肯定曉琳係鍾意我，如果唔係嘅話，又點會將子瑜同我嘅關係三番四次咁掛喺嘴邊。見到曉琳喊成咁，又踎咗咁耐，我怕佢對腳會好攰，我呢刻好想盡男仔風度扶返曉琳起身，再攬實佢氹返佢開心，但我又真係怕自己會捉錯用神，加上佢鍾意我都唔代表我可以任意咁對佢攬攬錫錫，萬一最後曉琳覺得我喺度非禮佢，咁樣會仲更加傷害咗佢。

但曉琳聽完我解釋之後，開始眼仔碌碌，百感交集咁望住我，而且我都留意到佢嘴角慢慢有返少少笑意。

「嘻嘻，抵你死吖，Miss Chan罰得你啱。」

「咁…為咗你俾佢罰吓有咩所謂。」

「唔得吖...你要補償返俾我...」冷不防突然間俾曉琳摵咗我手臂一下。