【校園／愛情】戀上鄰家女孩（布甸篇）: 59. 若然是全心全意

咁嘅情況之下撞到呢個藍社社長真係始料不及，雖然佢嘅嘢我聽得多，但面對面交流始終都係第一次，依家曉琳又未到，處境有啲尷尬。

「Hello...」

「你唔入去？你等緊曉琳？」社長問。

「哦...係啊。」

「哈，唔怪之得曉琳咁冧你，我入去熱身先，另外兩個隊友都到咗㗎喇，轉頭見。」





好彩我哋只係互相寒暄咗幾句佢就入咗去，而短短幾句交談中我推斷佢都係我其中一個隊友，咁點解曉琳唔事先同我講，唔通係怕我知道咗會唔肯應承佢參加呢個社際接力賽？

但我諗諗吓覺得唔對路，我基於咩原因會唔想同呢個社長一齊跑接力先？明明曉琳已經講過社長無再同佢一齊補習，換句話講都等於放棄無再追曉琳，咁理論上我同佢應該再無任何過節可言。

除咗一個可能性㗎啫，就係佢同子瑜嘅不確定關係，正正因為呢點，我對社長嘅芥蒂從來都未放低過…

記得上次曉琳俾子瑜同社長張合照我睇嘅時候，已經明顯地感覺到佢好在意我對於子瑜嘅感受，會唔會就係呢個原因，所以曉琳先一直都無同我講社長係其中一個隊友。如果係咁，陣間無論點都好，我喺曉琳面前都唔應該表現出我對社長有任何偏見，無謂再令佢諗多。

諗通咗之後心情都舒暢咗，但忽然間眼前一黑，有對嫩滑小手蒙蔽咗我雙眼，然後一把悠揚悅耳嘅聲音出現喺我身後。





「你估吓我係邊個～？」

「把聲咁好聽，仲唔係我個可愛又靚女嘅女朋友？」

「嘻，邊個係你女朋友～」曉琳忍唔住笑咗一聲。

「子...曉琳你囉。」

我的天啊，我差啲衝口而出鑄成大錯，好彩我機警改口改得夠快，個發音應該唔算好明顯，但願曉琳佢為意唔到。





「算你啦，我哋入去啦。」咁都可以蒙混過關…望住曉琳呢身白𠽌𠽌校裙打扮，活潑可愛又體貼溫柔，試問邊個會忍心傷害佢…

「曉琳，知你啱啱喺學校趕過嚟未食嘢，我買咗個包俾你。」我遞咗個紙袋俾曉琳，裡面裝住咗個腸仔包。

「你又知道我肚餓嘅～」曉琳接過包包，好開心咁咬住個包慢慢咀嚼，樣子惹人憐愛。

跟住我哋就一齊並肩行入運動場。臨近陸運會季節，自然多咗唔少著住中學體育服嘅男男女女出沒，不過其實好多都係抱住嚟湊熱鬧嘅心態，順便借啲意同異性同學增進下感情，認真跑嘅又唔係話無嘅，不過諗返起上年我都係因為陪子瑜同曉琳兩姊妹一齊跑步，先開始同曉琳結下姻緣。

原來咁又一年，時間過得真係快，我哋三個人一齊跑步、一齊傾偈、一齊食飯嘅日子已經一去不返，子瑜同曉琳之間亦都各自越走越遠。

而我嘅世界亦都開始慢慢同曉琳嘅另一個世界接軌，先係同曉琳一齊上Visual Arts堂嘅芯玲三姊妹，繼而到今日佢做藍社康樂幹事認識嘅人脈。

「嘩，帶埋女朋友嚟，唔夠你玩喎師兄。」依家講緊嘢嘅呢位先係真正嘅大師兄，連續兩屆男子甲組一百米冠軍，徑賽經驗豐富，生得高大又四肢發達，如無意外今年陸運會將會係佢最後一屆。

「識咩吖你，帶埋女朋友過嚟打氣有加乘㗎嘛。」相反呢位師兄身高唔突出，但只要你睇吓佢個腳瓜瓤，就估佢係踢開波，仲要似係打邊線可以千里走單騎下下爆落底線嗰種，我姑且叫住佢做二師兄先，因為佢著嗰件波衫號碼係二號。





「你兩個咪笑我啦，我唔係剩係嚟打氣㗎，我會幫你哋手計時㗎。」睇嚟曉琳同佢哋都幾熟，咁又係嘅，呢個都係佢做社幹事嘅基本職責。

「咁除咗計時呢？」大師兄開玩笑問曉琳。

「咪幫男朋友打氣囉，唔通幫你咩。」二師兄代答咗。

兩位師兄傾到開懷大笑，曉琳嘅魅力令到眾人嘅焦點都落咗喺我同曉琳身上，相對之下，原本散發住陽光氣息嘅社長師兄都變得黯淡無光。

我知道，如果呢個初次見面唔係曉琳陪我一齊嚟，大家都唔會咁比面我，我肯定無咁快可以融入其中。其實都唔係…應該係話假如唔係曉琳，我根本上就無呢個機會同班師兄一齊練跑比賽。