【校園／愛情】戀上鄰家女孩（布甸篇）: 60. 何以陷進此困局

自從我要去社際接力練習之後，曉琳為咗陪我練跑，原本籌備陸運會已經忙到甩轆嘅佢，而家幾乎星期一至五放咗學都無得休息，我哋拍拖嘅機會都少咗好多，所以曉琳話正好練跑可以忙裏偷閒陪吓我，而且兩位師兄都好鍾意見到曉琳，咁當然就唔係愛戀嘅嗰種鍾意啦，事關佢哋兩個都有女朋友，感情都幾穩定。

呢一日我接完曉琳放學，又一齊行去運動場練跑。

「今日個雞尾包好似甜過尋日嗰個好多。」一路上，我同曉琳一人一個包已經成為咗習慣。

「我想試一啖啊，可唔可以？」曉琳哄埋過嚟，於是我將個包遞俾佢咬一啖。

「嘩你條口水絲，俾人見到你食到咁論盡實無晒形象。」望住曉琳條口水絲仲連住佢嘴角，我反而唔係怕佢形象盡失，而係擔心呢個畫面會令周圍嘅男人充滿遐想，於是我用最原始嘅方法幫佢啜走條口水絲。





「你做咩又借啲意錫我喎。」

「今日都未錫過。」我拎返我個包專登咬埋落頭先曉琳咬過個位。

「你鍾意嘅話幾時都可以俾你錫。」

「咁再錫多一啖。」

「唔俾～」你個衰妹吖，又話可以隨時錫你，又擰歪面唔俾我錫。





「你啊，明明應承咗我可以上你屋企玩，但又無咗回事...」曉琳扁扁嘴。

哎呀，曉琳又提起呢件事...最近呢個禮拜我一直俾呢個煩惱纏繞住，曉琳扭計話想上我屋企玩，咁我屋企本身就無人嘅，我媽成十點鐘先放工返屋企，原先就無咩問題，但弊在...我怕一個唔該，到時帶曉琳上嚟嗰陣同子瑜撞到正嘅話...就算唔係撞到子瑜，撞到佢細佬都大件事...

雖然撞到子瑜嘅機率未必好高，以我為例自從我同曉琳拍拖之後，我都未試過返屋企嗰陣撞到子瑜，但只要有百分之一機會發生，我都唔敢去搏，因為個後果真係不堪設想，我唔知道到時曉琳會有咩反應，但肯定唔會易收科。

亦都因為呢個原因，我已經諗過好多理由希望可以打消曉琳嘅念頭，咁我住公屋㗎嘛，啲咩我屋企會時不時有人上門拍門追數，我條走廊龍蛇混雜好危險呢啲理由我都諗過晒，但到尾我又唔想講大話去呃曉琳，何況曉琳話想上我屋企玩喎...都唔知恨死出面幾多男仔。

以上通通都唔係辦法，更加無可能同子瑜約實個時間避開我同曉琳，我已經拖咗佢成個禮拜，一定要盡快諗啲計仔先得。





講起子瑜，記得嗰晚落大雨，我離開佢屋企返學校搵曉琳，之後連續好幾日我腦海都會不斷浮現出佢個容貌、佢嘅身影，我會控制唔到自己耐唔耐就想像下次相遇嗰陣可以同佢傾啲咩，講啲咩氹返佢開心。

不過最近呢種感覺又好似慢慢咁消散緊，無早嗰排咁強烈，理性啲諗，咁樣都係一件好事？

之後嗰個星期，曉琳開始忙到不可開交，距離陸運會得返一個禮拜，佢又要同老師開會，又要同學生會夾賽程安排，又要同義務幫手做工作人員嗰班同學仔講解當日安排，仲要照顧陸運會啦啦隊嗰班中一小朋友，變相無辦法抽到時間陪我練跑。

反而個社長仲可以次次都準時出現，我真係好好奇佢究竟擺咗幾多心機落社務度，硬係覺得曉琳日夜操勞做到咁攰，但社長個款依然係優哉游哉咁。

「點解呢幾日都唔見曉琳嘅？你兩個嗌咗交啊？」大師兄喺旁邊熱身拉緊筋。

「唔係啊，佢最近好忙，幾乎每日都要喺學校留到好夜。」我專登大聲啲確保社長都聽到。

「少咗個女仔幫手打氣計時，得返我哋幾條麻甩佬喺度硬係有啲唔慣添。」二師兄嘆一聲氣。

「你想睇靚女啫，人哋有男朋友㗎啦，幾時輪到你吖。」俾大師兄一語道破之後，二師兄即刻掉水樽還擊。





咁講真曉琳唔喺度，我對住兩位師兄同埋個社長都無咁自在，認真其實兩位師兄待我不薄，不過我對住社長就始終心裡面有條刺。

就係呢個時候，喺觀眾席上面，社長有意無意咁踩高一級向住我哋講：「喂大家可以放心，其實我今日都叫咗個女仔過嚟頂替曉琳個位置。」

「有無曉琳咁靚女先？」二師兄本能反應搶問。

「佢啱啱同我講就快到，到時你咪知。」社長神態開始散發緊一種自信。

我心諗，方死唔係早排我同曉琳喺度搶盡你光芒，你就趁曉琳唔得閒嗰陣，約個花瓶過嚟俾大家觀賞，幫你面上添返啲光彩咩。

「咁要見識下喇。」我衝口而出想潤吓佢。

「有個女仔行緊埋嚟，係咪就係佢？」我見二師兄即刻整一整自己啲頭髮，搞到我有啲忍唔住想笑，但我都跟佢向住個方向擰轉身一望。





個女仔喺我哋幾步之外嘅距離行緊過嚟。

著住白色大碼衛衣。

襯咗條短到無得再短嘅黑色真理褲。

佢一路耷低頭望住地下，直至到喺我哋面前停低嗰陣，先至同我目光對上。

呢一刻，我諗我哋兩個嘅眼神都掛上咗同一個疑問。

點解你會喺度嘅...？