《我老婆唔係我女朋友》【那些年／九十年代學界／真人】 第七章全新中篇！: 【第七章】 出租男伴「游」（２）
他頓了頓繼續說：「而且Zoe個盤有好多玩法，除咗買下盤賭輸贏外，又有大細盤計吓分，攜聯其他院校玩過關，不過最大嘅戲碼都係你嗰場決賽，好彩練馬師啲貼士準，我篤定你嘅時間入到決賽，買穩膽做位置，再拖啲腳就容易賺到錢啦，總舵主都喺我條Q入面。」Leon尤如馬評分析，條友有精算唔去讀，真係社會的損失。
Leon轉頭向阿材說：「阿心係呢條友嘅教練。你有嘢想搵佢幫手就趁而家開聲嘞，佢唔答應可以再搵佢教練出馬，佢教練一下旨，呢條友就收皮㗎喇，哈。」
「誒…阿仁，係噉嘅，我都係最近先知你游水咁勁，不過唔知你識唔識拯溺呢？」阿材老實臉誠惶誠恐的問。
「吓？！咩話？」我發出頗為大聲的反應，明明講緊賭局，突然風馬牛不相及，腦筋一時轉唔切彎。
「佢想搵人做臨時救生員，傍住去玩水呀，你中學時好似做過暑假工㗎。」Leon出口幫拖，生怕我嚇壞阿材。
救生員不足是長期問題，政府每年都會招聘合約臨時救生員，原因是工作缺乏穩定性，泳池在冬天關閉後就變相失業（以前長工甚至在冬天被調派去做園丁），加上政府只將救人專業等同於技工職級，所以一直也難以吸引新人加入；然而對於只有中學學歷的廢青，「泳季救生員」的臨時合約，卻是一件非常「筍」的暑期工，日薪差不多有300大洋一天！仲可以奉旨齋坐同時𥄫女啊。
所以我們練水那輩人，往往都會「順手」考埋救生員資格，當時的計算是，萬一不能繼續升學，也算有一技傍身，夏季時日日有工開啊。