出租男伴「游」
 
Leon說完後向阿材打個眼色,阿材會意將一本封面寫著Sociology的參考書交給我。
 
阿材接口說:「欵,派彩夾喺入面,返到去先好打開本書,所謂寧俾人知莫俾人見,畢竟兩位都唔係宿生,無資格投注嘅。」他轉頭向Leon說:「你啲本錢都算埋喺裡面喇。」
 
「得啦,一世人兩老表,信你唔過咩。」Leon輕鬆的拍拍老表膊頭。
 
我腦中不停浮現黑人問號。「喂喂,點解係我落欖嘅?盤口幾多,點賭我都未知喎。老表,你又肯陪佢癲嘅?你唔驚俾人爆大鑊咩。」前一句是問Leon的,後一句是問阿材的。
 


「兄弟,我出本幫你落欖嘅,噉我叫你去比賽嘛,無理由唔幫你撈返啲福利㗎。至於阿材,其實係佢有事想搵你幫手,但你又備戰緊,日日都攰到想殺人噉款,佢咪嚟搵咗我先囉,我咪又順水推舟,反正阿材擔屎唔偷食,唔怕佢食夾棍。」Leon一次過幫阿材答埋。
 
阿材毫不介意Leon的擔屎論,繼續補充道:「我唔賭啫,但我啲Friend都有買嘛,佢哋話個莊咁大,安全嘅。」
 
我心驚膽怯的問Leon:「但你又唔知我狀態,亂買唔驚輸死咩?」雖然而家先來擔心未免太遲了。
 
「哈哈,此言差矣…(阿材在旁邊插口:哈,馬飛金句~)嗱,教精你啦,我係馬主,我隻馬出賽,我點會去問隻馬自己狀態如何呀?有無信心呀?識問梗係問個練馬師啦!我隔日就去同阿心收風,佢將你嘅狀態話我知(阿材插口:邊個阿心呀?),不過阿心都係屬於被隔離嘅知情人士。」原來Leon向我最貼身那骨妹埋手。

已有 0 人追稿