《我老婆唔係我女朋友》【那些年／九十年代學界／真人】 第七章全新中篇！: 【第七章】 練水都有出頭天（１）
練水都有出頭天
暑假是各類兼職工種大執位的日子，原本興旺的私人補習市場，會隨著學校的考試季節結束而步入寒冬；相反平日靠「福利費」吊鹽水的泳會生意，就因為天氣炎熱和放暑假而變得忙碌起來。
不過今個暑假都有暗湧的，新聞報導上星期有人在泳池感染「阿米巴變形蟲」，使得這兩個星期整個麗池都吹起整肅風氣，又清潔又消毒。唉～唔知係唔係心理作用，池水啲氯氣好似落得重手咗，醃眼醃到有點痛。
真正放暑假後，黃昏如常的返麗池開工，小學雞們大都還有一星期才放假，但其實已經考完試，每天返學都是hea啫（嘿，大中小學雞返學哪有一天不是hea呢），所以來練水的人仔都比平日輕鬆，有部份仲帶埋同學來游「免費水」。係呀，咪又係以前踢你入會嗰啲套路囉。
肥佬見我返到泳池，召我過去畀咗張宣傳單我睇。「『強身健體，練氣防喘，廣結良朋，街坊聯誼』，阿直，乜春嚟㗎～？」我無法掩飾面上的黑人問號，仆街我睇緊啲乜嘢呀？
肥直不理我的問號，劈頭就問我：「答咗我先，你有無考救生員呀？」
我打咗個突，心諗咩料呀，呢期個個都問救生員嘅？莫非是夏日熱賣推介。
「有～中學時考咗啦，有得加人工呀？」話晒都專業資格吖，你估真係好似我敷衍無知少女噉講——阿豬阿狗都有咩。