《我老婆唔係我女朋友》【那些年／九十年代學界／真人】 第七章全新中篇！: 【第七章】 練水都有出頭天（２）
「有就𠶧啦，你手上嗰張係社區中心搞嘅暑期習泳班。中心想增加收入，趁暑假搞班，你未搵暑期工㗎？你做啦。」肥直像是鬆了口氣。
希望大家還記得荔閣泳會是由社區中心撥款營運的。但我門小你「廣結良朋，街坊聯誼」？邊條粉皮作㗎～
在未搞清楚乜嘢料之前，我當然不敢表示甚麼，遂說：「哦，我仲以為係個啲國術舞獅班宣傳添，阿直你自己唔教嘅？」
其實我胸無大志，只想閒時多啲黐住阿心，晚間繼續兼職教水，做其高級廢青，輕鬆hea完暑假就算。再者真係有時間都打爆FF4先啦，仆街上年玩到而家，足足大半年，年頭連FF5都出埋嘞～～之前日日狂谷備戰，攰到有金手指都無精神玩。
啊，唔記得講，阿心兩姊妹唔使搵暑期工的，佢哋暑假負責看舖（佢老竇間士多或跌打舗），所以我的如意算盤就是，趁佢看舖時我就落去打躉，黐飲黐食黐阿心，再唔係帶埋部「超任」去士多仔打機，呵呵呵。
肥直突然大聲噴我：「叫你個早死仔（潮州話短命仔）教就教啦，我～乜嘢身份呀，挑！」
我大感奇怪，肥佬講嘢好少咁大架子。「點呀阿直，輸咗馬咩？咁燥嘅。」其實馬仔都唞咗暑啦，點會有馬輸呢，亂噏吓引佢講嘢啫。
果然肥佬尤如成肚腩火藥，一觸即爆：「嗰個肥婆蔡呀，話民政署規定要係合格救生員先可以教習泳班呀，我費隱事同佢嘈，同佢講咗話你去頂㗎喇。」