《我老婆唔係我女朋友》【那些年／九十年代學界／真人】 第七章全新中篇！: 【第八章】 全民學星（３）
李博士稍為停了一會，待大家消化了有機會看到過百流星的震撼後再繼續：「流星雨大家知係咩嘢啦，問問大家，今晚我哋睇邊範流星雨呢…（大伙兒又七嘴八舌：英仙座流星雨）…好，大家都好畀面總算未瞓著，英仙座流星雨（Perseids）係以英仙座星群附近為輻射點出現嘅流星雨。聽清楚呀，今晚嘅流星雨其實係同英仙座啲星無關㗎…（一眾學生張口結舌，包括我在內，誰想到成日講英仙座原來唔關事嘅）…嘿，估唔到哩。
因為流星雨輻射點喺英仙座左近，所以就乾脆以英仙座嚟命名，咁乜嘢係輻射點呢？原來大部份嘅流星出現時，睇起嚟好似從天空某一個點向四面八方爆射出去，而嗰個爆發點就叫做『輻射點』嘞，由於彗星週期巡行嘅軌跡變化唔大，因此喺下個回歸週期，只要搵返相同嘅位置，就可以捕返嗰粒慧星所散射嘅流星喇，而最簡單喺天空搵位置呢，自然就係用星座嚟定位…（場中大家同聲同氣：哦～）…
所以大家想捕捉流星雨，首要學觀星，當然今晚我哋要學識搵英仙座啦。英仙座Perseus係北天星座，以希臘神話英雄柏修斯命名，最有名嘅傳說就係斬咗蛇髮女妖美杜莎，用佢個頭令到敵人石化…（又有人開始打呵欠了）…唏，《聖鬥士》裡面都有英仙座白銀聖鬥士，佢嘅武器正正就係『美杜莎之盾』…（在眾人竊竊私語之際，博士掛起一張星圖在外面）嗱，呢張就係英仙座嘅恆星表列圖，你留意吓星群構成嘅外圍形狀，就好似柏修斯右手舉刀喺頭頂，左手執著美杜莎嘅頭於腰間，以半跪嘅姿態腳踏一雙有飛翼嘅鞋。係呀，睇星要畀少少想像力嘅…」李博士一口氣講了幾乎半個鐘。
我忍不住跟Leon吐糟：「門小你鹵味，都無話咁甩皮甩骨吓嘛…」