[中六續集][愛情][懸疑？]擁抱，失憶(重修版): 二十六.

佢沉默咗一陣，嘆咗啖氣：「恕我冒犯，某程度上係。」

「其實都唔冒犯嘅，講事實嗜。」我苦笑。

佢講得好隱晦，畢竟有啲嘢我自己知就得。

畫公仔唔洗畫出腸，因為冇人想知成日食煙嘅米奇老鼠個肺係黑色。

「咁你嚟搵我係想？」我問佢。



「我想幫你，因為我覺得你同佢一齊唔係壞事。」佢拍咗拍我膊頭：「你係一個好男人，只不過你冇車冇樓冇錢啫。」

唔洗講到咁直啊嘛？

「多謝你，雖然後面嗰堆有啲難聽。」我苦笑：「咁你仲可以點幫我？你都唔可以出手。」

「我唔可以出手啫，但你可以啊嘛。」

「我咩都唔識，點出手？」



「我會比樣嘢你用。」

講完，佢就伸手入大褸嘅內袋。

有咩嘢需要擺落內袋？成件事好唔對路。

我撳住佢隻手：「喂咪呀，呢啲嘢我做唔出。」

「咩做唔出？」



「你唔係要比嘢我隊冧嗰條友咩？」

「大佬啊，呢到香港嚟架，搵枝槍比你好難架。」佢反咗反白眼：「更何況我哋呢行啲人冇咁暴力。」

「咁你要拎啲咩？」

我鬆手，佢喺內袋拎咗一枝用紅線織成嘅棍出嚟。

「呢個你拎去。」佢將枝棍遞比我。

我接住枝棍，上上下下都望咗一輪：「呢枝嘢咩嚟？」

枝棍同原子筆差唔多咁長咁粗，睇唔出有啲咩特別。

「呢枝係用九百九十九條紅線織埋一齊嘅棍。」佢解釋：「月老用一條紅線連住兩個人，既然一條比人剪咗，咁我就幫你用九百九十九條連返佢。」



「咁枝嘢點用？」

「你哋到時一人摸住一邊，成功嘅話佢就會記得返曬啲嘢，另外就係做嘢嗰條友同我都一定要在場。」

「點解做嘢嗰條友同你要在場，同埋失敗嘅話會點？」

「解鈴還須系鈴人，所以做嘢嗰個要在場，但你哋唔洗佢解，因為枝棍會幫你哋炸開個結，而我要在場就係因為枝棍係我整嘅，只要我唔在場佢就咩用都冇。」