[中六續集][愛情][懸疑？]擁抱，失憶(重修版): 六十.

「見咩客啊？」

你仲問？

「冇啊，都係以前啲客咋嘛。」

我唔知點答你啊。

「哦。」



不過話時話。

「做咩無啦啦咁好奇嘅？」

你以前都唔會問我見咩客、去做咩，因為我係咩都做，所以講咗你都未必明。

「冇啊，好奇下咋嘛。」

應該冇咁簡單。



「咁你今日想去邊啊？」

今日放假喎。

「嗯…」佢諗咗陣：「我想去大尾督。」

大尾督？

「去燒烤定做咩？」



講得大尾督就通常都係燒烤架啦。

「唔係啊，我想去影相同埋睇日落。」

咁搞笑？

「咁行啦。」

不過既然你想，咁就行啦。

「等陣先。」

講完，佢就行去拎咗部相機同SD卡出嚟。

「係喎，唔拎機點影相。」



你唔拎出嚟我都唔記得。

佢坐返低：「你過嚟啊。」

我挨個身埋去，而佢就將部機掛落我條頸到。

「咁張SD卡…」

我知佢想問咩，所以就直接打斷咗佢：「比我擺銀包暗格啦。」

佢就將張SD卡遞咗比我，而我就將佢塞咗落銀包暗格。

「咁我去換衫先。」



講完，佢就行咗返房。

過咗陣，佢著住米色工人褲加白色長袖打底，仲要揹住個細細粒嘅唐老鴨鈄揹袋。

唔知點解我覺得呢個套裝好熟悉，但又講唔出佢幾時著過。

「咁行啦。」我起身。

我哋落到樓下一開門就見到巴士站有架接駁巴停低咗，而啊晴都即刻嚟返個火影跑。

佢就火影跑，而我就繼續慢慢行，因為根本就追唔到。

佢先跑到一半，但架車已經走咗。

佢跑返轉頭嚟搵我：「死傻佬做咩唔跑啊？」



「放假啊嘛。」我摸咗摸佢個頭：「跑咁快做咩啫？」

跑咁快，趕住投胎啊？

「你唔請返我食冰糖士多啤同雪條就嬲死你！」

知喇。

「好啦好啦。」

你仲有樣嘢未講。

「仲有可樂啊！」



咁先啱架嘛。