[中六續集][愛情][懸疑？]擁抱，失憶(重修版): 八十八.

你講到咁，都係想搲水吹啫。

我苦笑：「點解你會咁覺得？」

就同你吹下。

佢微笑：「要見到嘅，總會見到。」

聽君一席話，如聽一席話。





我嘆氣：「你係咪講緊廢話？」

定係你讀緊經？

佢冷笑一聲：「你未參透到啫。」

我頂你個肺啊！

「吹個水仲要我參透？」我苦笑：「你慈山寺落嚟架？」





啲頭髮長癩癩咁，唔似係尼姑喎。

「梗係唔係啦。」佢苦笑：「你有見過尼姑咁MK架咩。」

咁你就唔好講經啦。

我望一望枝煙：「你有咩要講好快啲講喇，我枝煙就燒完。」

趕住返去啊，唔好喺到Talk shit啦。





「返去陪老婆啊嘛，我知啊。」佢撳熄煙頭：「我都走先，有嘢做。」

佢講完就轉身向橋嗰邊行，而我就相反。

等陣先…

我轉身：「你點知我有老婆架？」

我頂吖。

轉個身就唔見咗，保特啊？

我嘆氣：「真係。」

越嚟越多怪事發生，我個頭都越嚟越痛。





電話響起，係啊晴。

我：喂，做咩啊？

佢應該都差唔多收工。

晴：我返緊嚟，你想我煮定點？

又要麻煩你，唔好啦。

我：食魚蛋粉啦，你煮完又要洗。

因為有可能係我洗，所以都係唔好煮。





晴：咁好啦，你去嗌定嘢食等我啦。

不嬲都係咁架啦。

我：知喇。

等你啊。

晴：錫曬你喇，掰掰。

電話收線，我都慢慢行返去。

凍奶茶依舊係老闆娘嘅出品，奶同茶依舊都係完美咁融合。

但我就係忍唔住攪佢，仲攪到失曬神。





老闆娘見啊晴未到就喺我對面坐低，之後就慢慢咁將我杯奶茶推走。

我鬆開飲管：「做咩啊？」

佢冇講嘢，淨係望住杯奶茶。

我望落去，見到啲冰已經融曬。

「我問你做咩就真。」老闆娘拎走杯奶茶：「呢杯唔好飲喇，我整過杯比你。」

我點頭道謝，而佢都好快就拎咗另一杯凍奶茶出嚟。

老闆娘放低奶茶：「煩緊老婆？」





你又有神通？

我擘大個口得個窿：「你點知架？」

我咩都未講喎。

「做人幾廿年，觀人入微架嘛。」佢微笑：「同佢傾下啦。」

嗯。

我繼續攪杯奶茶：「會架喇，有心。」

佢拍咗拍我膊頭就起身行返去廚房，而啊晴都終於到。