沙頭角與長洲的距離(重修版): 十七.

我好似啲啱啱開始返學嘅小朋友咁，用期待嘅眼神望住佢。

「知唔知咩係閃婚？」

呢個係近年出現嘅詞語，指緊嘅係情侶拍拖冇耐，甚至識咗冇耐就就結婚。

「我知啊，做咩？」

「你知唔知點解閃婚人士嘅離婚率特別高？」



呢個係一個簡單嘅問題，我諗連啲Form 1仔都識答。

「都冇拍過拖，甚至有啲先啱啱識，根本就唔了解大家。」

「無錯，但同一時間都有人閃婚就一世，點解？」

愛情呢家嘢，純粹就係一堆巧合砌埋一齊啫。

「喺啱嘅時候搵啱人又有緣份，咁咪一世囉。」



佢皺眉：「我唔係咁諗。」

我都幾想聽下佢與別不同嘅諗法，因為除咗我啱啱講嘅，我都冇其他諗法。

「其實愛情根本就係一場信任遊戲。」

呢個係咩諗法？呢單嘢聽落去好悲觀。

「雖然而家好多騙子啫，都唔洗咁悲觀啩。」



「講真，人有時連自己嘅諗法都觸摸唔透，更何況講出嚟。」

呢個我認同，有陣時我真係唔知自己喺到諗緊咩，要我將自己嘅諗法講出嚟更加係天方夜譚。

「咁但係都唔洗摸到透曬先一起或者結婚架，因為人總有嘢唔想比人知架，好似我鍾意睇三上咁。」

等陣先，我好似講漏口。

「你個死人頭啊，講緊認真嘢你同我講AV女優！」佢用力彈咗我額頭一嘢。

佢彈得好大力，個額頭比佢彈到紅左一撻，差啲就腦震盪。

不過痛嘅同時都幾舒服，差啲就發出奇怪嘅叫聲，好彩我嚟得切用力合埋個嘴。

「痛啊！」我撳住額頭，扁曬嘴：「對唔住囉，洗唔洗咁大力啊？」



我呵咗呵我額頭，摸咗摸我個頭，攬咗攬我：「冇事冇事，呵返呵返。」

廿幾歲人，仲想當我小朋友咁氹？

梗係得啦，我仲好鍾意添！