沙頭角與長洲的距離(重修版): 十八.

我用頭捽咗捽佢：「好啦，算你啦。」

「咁我可以繼續講未啊？」

我冇應佢，淨係扤咗扤頭。

「既然你都識講，你連自己都摸唔透、唔識表達出嚟或者唔想表達出嚟，更何況人哋？」

她望住我，好似喺到等緊我比反應佢，但係我完全唔知講咩好，唯有尷尬咁笑住扤咗扤頭。



「仲有人類喺某程度上係好恐怖。」佢嘆咗啖氣：「好撚恐怖。」

「係咩？我冇咩感覺。」

可能係因為我同地盤嘅同事都好熟，甚至啲大粒過我嘅都會叫埋我哋一齊去玩，唔覺得佢哋會有咩不軌企圖。

「除咗反射動作，所有動作同說話都可以係假。」佢繼續講：「而最恐怖嘅係，人類唔止可以呃人，仲可以呃埋自己。」

呢個我同意，上次我返工弄親，係都要扮曬型咁話唔痛，結果講下講下就真係唔覺痛，但係手臂上面整親嗰個位瘀到發曬紫。



「咁同你所講嘅講個信字有咩關係？」

我諗呢個先係重點。

「當一切都可以係假嘅時候，咁一切都唔再重要，只係睇你信唔信啫。」

「信又點？唔信又點？」

「信嘅人點都會信，唔信嘅人就算知道真相唔係佢諗咁樣，佢都係唔信，然後再另尋機會試探佢，直到搵到對方痛腳為止。」



「因為事實同佢諗嘅唔同，而佢唔想自己係錯。」 

「人從來都唔想自己係錯，所以會一直去搵嘢證明自己係啱，就算搵到嗰樣嘢有冇根據、合唔合理都好。」

我諗我大概明佢想講咩，但係突然嚟個咁長嘅演講係為咗啲咩？

「咁你講咁耐，除咗想講經，仲有咩想表達？」我問佢。

佢冇講嘢，淨係望住我，露出不懷好意嘅笑容。

佢唔係諗住…

喺我估到佢想做咩嘅同時，一切都已經嚟得太遲。

佢坐喺我身上面，個身彎落嚟，將我雙手撳喺床上面：「我想講嘅係，我信你囉。」