沙頭角與長洲的距離(重修版): 二十九.

可能真係因為我望住佢而比咗好大壓力佢，佢唔洗好耐就食曬啲嘢。

「你係咪真係想整架？」佢包好啲垃圾：「因為我要整嘢架。」

「係啊，垃圾比我啦，你去整嘢先。」

「咁你揼完垃圾過嚟後面搵我啦。」

講完，佢就推開後面道門行咗入去。



我出去揼完垃圾就行咗返去，一開門就見到佢拎住個唔知裝住啲咩嘅鐵桶，行路擺嚟擺去，好似行緊獨木橋咁。

我望望周圍，見到身邊有張凳仔就一嘢坐咗落去。

「你個死人頭坐喺到做咩啊？」佢嗌我：「快啲過嚟幫手啦！」

「拎啲桶過去？」我指住佢後面嗰幾個鐵桶：「呢幾個啊？」

「係啊，快啲啦！」佢放低鐵桶：「再唔幫手信唔信我打柒你個死人頭呀嗱！」



鐵桶隔離係一張枱，一間應該就係喺上面整陶泥。

我咋咋聲跳起身，跑過去拎起兩個鐵桶。

鐵桶唔算係好重，但係考慮到佢係女仔，確實係有啲難度。

「拎去邊啊？」我問佢。

「擺喺我嗰桶隔離得喇。」



「收到你。」

我將兩個鐵桶擺喺佢嗰桶隔離：「仲有冇嘢要搞啊？」

「冇喇，你拎張凳仔過嚟坐低啦。」

我將頭先坐嗰張凳仔拎過去枱隔離：「呢張係咪就係嗰張會轉轉轉嘅枱？」

「係啊，咁你而家睇住我整喇喎。」佢將一舊陶泥擺上枱。

佢噠著拖板個電掣，張枱都開始轉。

我就好似去興趣班嗰啲小朋友咁，坐喺個老師身邊托住下巴咁望住佢整。

過咗一陣，佢已經整咗個杯嘅形狀出嚟，但係我完成唔知佢做咗啲咩。



或者咁講，係睇得明但做唔到，同睇網上啲打機操作精華一樣。

佢將啲陶泥整返做一舊嘢：「你試下整。」

講完，佢就企咗起身。

「吓？」

有冇咁突然啊？

「試下先啦。」佢拍咗拍張凳。

我緊張到手都震曬，坐低整咗陣就停咗手。



「點解會咁嘅？」我問佢。

「我都唔知啊，咩人整咩嘢啩。」佢淫笑。

我會咁問，係因為陶泥比我整咗做「蛋」同「腸」嘅形狀。

「咩啊，我明明咁正常。」我將手指上面嘅陶泥抹落佢鼻頭。

「喂呀！」佢輕力咁打落我手臂。