沙頭角與長洲的距離(重修版): 五十六.

有冇咁黐線啊？

「佢會唔會咁快懷疑我啊？」

啱啱先一齊，點會？

「同埋佢個彈弓點裝法？」

搵啊恩嚟係美人計？



「龍叔我閱女無數都覺得條女唔差，換著你呢啲傻仔見到一定精蟲上腦，冇房都拉入草叢執返劑先。」

的確，大部分男人見到佢呢個Level嘅女都忍唔住上。

「但我有分寸架嘛。」

但我唔係嗰種人囉。

「咁佢唔知啊嘛，你哋一齊咗好耐咩？」



駁唔刀。

「你都啱。」

但要試我，唔係代表佢唔信我咩？

「咁話時話你琴日有冇送人哋返去？」

話時話，我哋好似就嚟遲到。



我睇咗睇錶：「不如行住講？」

龍叔睇咗睇電話：「碌柒，最衰都係你條撚樣。」

好似係你負責揸車架喎。

「咁行啦好嗎？」

佢冇答我，擺返好部電話就開車。

「咁你有冇送人返屋企？」

原本唔想。

「最後都係有送，不過係送上酒店。」



聽到酒店呢兩隻字，龍叔即刻用淫賤嘅眼神望住我，仲舔咗舔脷。

「點啊，食得和唔和味啊？」佢用油膩過豬油嘅聲線問我。

你條死淫蟲真係。

「冇啊，咩都冇搞啊。」

我估你都唔信架喇。

佢用一個質疑嘅眼神望住我：「咁做咩要送上酒店嘅？」

人哋叫酒店，唔係叫炮房，唔一定係要扑野先去得。



「佢住長洲，琴晚太夜冇船搭。」

返唔到屋企，唔通叫佢瞓街咩？

「咁做咩唔帶佢去你到瞓？又要人嘥酒店錢。」

帶佢返你屋企啊笨！

「你都黐線嘅！」

都話佢佢係我條女嘅朋友，而家「妻之朋友即是炮友」啊？

「咁如果你呢單嘢就算做咗都係得當事人知呢？」

咁講嘅話…我都唔知自己會點做。



「我可能真係會上咗先算。」

因為你都講到咁。

「咁咪係囉。」

但係…

「我唔係因為愛去做囉，而係純粹為咗發洩嗰下性慾。」

性同愛分開呢樣嘢喺呢個時代應該唔係啲咩特別嘢啩？