沙頭角與長洲的距離(重修版): 五十八.

「咁我點算好？」

我都唔知點好。

「首先，佢個Friend未必係間諜，就算係都係動咗真情嘅間諜。」

動咗真情嘅間諜？

「唔明。」



真係好亂。

「佢爆料比你似係想挑撥離間。」

即係…

「佢對我有啲嘢，同一時間我條女都喺背後做咗啲嘢？」

會唔會啊？



「可能係架。」

拍戲都冇咁痴線喎老細。

「我又唔係靚仔，更加唔係有錢佬，有必要咩？」

爭個地盤佬？你會唔會對我太有信心啊龍叔？

「關咩事啫？」



你咁講，我又真係駁唔刀。

連乞衣都有人鍾意，地盤佬有人鍾意有幾出奇？

「咁你想點啊而家？」

我都唔肯定，但…

「我想去自己睇下先。」

但應該點？

「你想去自己睇下？」

係啊。



「有咩建議？」

佢笑住咁擰咗擰頭，似係恥笑緊我。

「今日收好早，你搭入去視察下囉。」

認真咩？

「唔係咁好啩？」

好似好唔信佢咁。

「比佢撞破咪話比Suprise佢囉。」



有計劃架喎。

「咁如果冇比佢撞破呢？」

既然係咁，你就幫我Plan埋啦。

「冇撞破又有見到嘢咪攤牌，冇見到嘢咪直接走或者搵佢食個飯囉。」

唔該曬。

咁我…收咗工就過去啦。

…

..



.

收工之後我冇同班師傅食飯就直接去咗碼頭，費事過到去太夜。

上船嘅時候我拎咗部電話出嚟，打開咗同佢嘅Whatsapp。

我手指停留喺鍵盤上面，有啲想打字。

但開船之後，我都係一隻字都冇打過。

訊號隨住隻船離岸慢慢咁減弱，由五格去到得返一格。

我終於打咗「我嚟緊」呢一句嘢出嚟，但我部電話已經再收唔到訊號。



…

..

.

船泊岸，船上嘅人陸續咁落船。

過咗冇耐，船上面已經得返我一個。

我唔想落船，更唔想睇到啲我唔想睇到嘅嘢。

但可惜呢廿四個七淨係可以坐一程，想再坐就一定要落船出閘。