別人名字，我的姓氏(上集): 1. 小時候的我

如果，自己嘅名係同其他人一樣，大家會唔會尷尬呢?
 
因為其他人嘅遺憾，為左補償自己過去，而將自己女兒改為過去他人嘅名，又點呢?
 
自出娘胎以來，我就知道，我自己個名同其中一個親人個名係相同，唔止中文名，就連英文名都係一樣
 
不過奇怪嘅係，我同佢擁有唔同姓氏
 
但係爸爸永遠要我叫佢做姑姐，但係經常叫名的話，好易會溝亂我地
 


我地兩個都係叫詩敏，英文名Jasmine
 
我係程詩敏，姑姐係張詩敏
 
所以大家都會叫我做小敏
 
我呢個「姑姐」生得真係唔錯，我媽咪同姨姨已經係美人，雖然「姑姐」冇佢地咁靚，但係佢一笑果時，就自己散發出一種好特別嘅氣息
 
爸爸同「姑姐」好似永遠最傾得埋，有時媽咪都唔知嘅野，只要問下「姑姐」，就一定有答案
 


有時我懷疑，「姑姐」先係我媽咪
 
而且「姑姐」仲好錫我，佢同爸爸一樣，不過爸爸係完全寵我，所以我成為左屋企嘅公主
 
係我2歲果年，我細佬出世
 
我地就咁一家四口，住係個兩房單位之中，我以蝦細佬為我嘅嗜好
 
細個我唔舒服時，媽咪總係帶我去公公到睇醫生
 


公公亦都好錫我地兩姊弟，而且每一次去診所，我地都會見到姑媽
 
細個時，會由婆婆照顧我地兩姊弟，如果遇上婆婆唔得閒，姑媽就會黎照顧我地
 
而且我地仲有一個姨姨，佢係細佬出世後一年，生左一對孖女
 
就係咁，我地連同姨姨對孖女，組成左一男三女呢個小圈子
 
當然大家姐係我啦
 
我好鍾意同對孖女表妹玩架，而我細佬呢，就永遠做我地跑腿
 
我由幼稚園開始，就已經係班中嘅大家姐
 
所有人都要聽我命令


 
我有咩做錯都好，爸爸總係第一個走出黎保護我
 
係我5歲果一年，姑姐結婚啦，我第一次做花女
 
果日姑姐喊得好犀利，爸爸媽媽，仲有姑媽不停咁安慰姑姐
 
係姑姐結婚後一年，當年我6歲，剛先升小一
 
媽咪幫我揀左佢同姨姨同埋爸爸以前讀嘅小學，西區官立小學
 
果一晚，媽咪叫左我同細佬入房
 
媽咪同我地講，佢肚入邊有個細佬啦
 


當時我同細佬反應係：間屋邊住到咁多人呀?
 
由於爸爸係飛機師關係，經常都唔係屋企
 
於是，校長婆婆，即係姑姐個媽咪間唔中會黎睇下我地
 
而我係大女關係，所以更加有責任照顧屋企
 
係我剛升小二果一年，發生左件好大嘅事
 
當日正常黎講，係由婆婆接我放學，再去接埋細佬放幼稚園
 
不過當日，放學時接我嘅，係姨姨同姨丈
 
當時細佬同兩個表妹已經係車上等緊，姨姨一接到我就立即叫姨丈開車去醫院


 
原來，媽咪係上堂期間肚痛，係學校已經生左細細佬出黎
 
佢差少少就係早產，所以一出世後就係氧氣箱之中瞓
 
媽咪就係病房休息
 
公公婆婆、姨姨同姨丈都好擔心。果時，我緊緊拖實細佬
 
我身為大家姐 ，要盡力照顧屋企