《想溝到女千祈唔好學我咁》: 3.7

「你叫咩名啊，小朋友？」我踎低身，遷就返小朋友嘅高度問。

「Sa！哈哈，傻仔啊！我叫趙敏聰，記住我啦！」突然，眼前變得灰濛濛，好似有啲濃煙攻入眼，睇清楚之後先發現，原來個小朋友將一早準備好嘅粉筆粉儲落杯，然後兜頭淋咗落我到。

突然受到襲擊，一浸火滾嘅怒氣喺我體內湧緊上嚟，當我正想怒罵呢個囂張跋扈嘅小朋友果陣，有隻手搭咗落我膊頭。

我轉身一望，係阿南，佢對住我搖搖頭，應該係示意我唔好喺到發難。

「喂，聰聰，做咩整蠱哥哥啊？」阿南踎咗喺我隔離，問個小朋友。





「佢個樣好懵囉，傻更更咁。」

「咁都唔可以咁樣整蠱哥哥㗎嘛，啲粉咁污糟，要同哥哥玩，咁樣都得㗎！」阿南突然鏈住我下腮，隔硬嘟起我個嘴。

喺俾佢整嘅一瞬間，原來佢隻手好嫩滑，突然受到咁大衝擊嘅我，心跳直接跳升至一分鐘180下，我感覺到佢再唔放手我有可能當場暴斃。

「哈哈哈，金魚哥哥啊！」隔離嘅三個小朋友即刻笑咗出嚟。

「哼，仲樣衰咗。」





睇嚟，呢個趙敏聰，會係一個相當難搞嘅小朋友。