《想溝到女千祈唔好學我咁》: 3.8

我哋同小朋友玩咗幾個阿南同子晴諗嘅小遊戲，都係一啲簡單嘅Ice Breaking Game，好快，幾個小朋友都已經融入咗呢個快樂嘅氣氛。估唔到喺咁狹小嘅房間入面，選擇玩呢啲小遊戲竟然係上策，其他組表演魔術、話劇呢啲需要一定空間嘅活動反而變得礙手礙腳，小朋友嘅反應亦唔算太激烈。

「佢哋又幾聰明喎。」洛賓都靜靜雞同我講。

喺休息期間，我地一人負責睇住一個小朋友，聰聰淨係肯跟住阿南，洛賓睇住阿輝，千千交咗俾子晴，而我就負責照顧若儀。

「正哥哥你食！」若儀竟然將佢頭先玩遊戲贏嘅甜糖送俾我。

「你唔食？」





「食完糖先會開心啊嘛。」

「我都冇唔開心。」

「你頭先一直都冇笑嘅。」俾佢咁樣講，當刻嘅我當頭棒喝，雖然頭先一直玩遊戲，但係我都冇參與太多，最多喺側邊輔助一下，需要嘅笑容自然亦欠奉。

「哧！你食啦。」估唔到我會俾個小朋友哄返轉頭，我摸一摸佢個頭，突然覺得小朋友獨有嘅純真，真係好珍貴。

雖然我從來冇歧視過佢哋，但之前咁樣話佢哋，實在係有啲過意唔去。





「啊！！」若儀突然間嗌咗出嚟。原來係聰聰喺後面扯咗佢頭髮一下。

「咁咋㗎，唔好玩！」佢正打算轉身走嘅時候就俾我捉住咗。

「做咩啊！俾我走！」聰聰不斷掙扎，但佢當然冇我咁大力。

「整痛女仔仲想走？」

「咩事？」洛賓帶住輝仔行過嚟。





「個細路冇啦啦抆人頭髮。」

「鬼叫佢唔扎頭髮！放開我啊！」

「嘩，佢賴皮嘅功力比得上你。」洛賓細細聲咁笑住同我講。

「彈啦你。」

「放開你都得，你同若儀道歉先。」我對聰聰講。

「睬你都傻！唔道！」