《想溝到女千祈唔好學我咁》: 7.4

知道佢唔會再阻礙阿星同阿柔之後，我對佢嘅戒備亦都冇咁高。至此之後，我哋都多咗傾偈，發現其實佢都冇想像中咁壞，始終佢都只係爭取自己想要嘅嘢。有時仲會做啲好出人意表嘅事。譬如當阿星同符文安練波果陣，會叫埋阿柔一齊幫阿星打氣，重挫符文安銳氣。又會教阿雄點樣進一步變得硬朗啲，去討嘉慧歡心。

「呢本啱你。」圖書館，亦成為我哋最常聚腳嘅地方，原來佢好鍾意睇小說，成日會為咗睇完本小說而廢寢忘餐。

「《浪》？咩嚟？」佢將一本小說遞俾我。

「你冇睇過咩？兩個主角萍水相逢，牽起驚濤駭浪，可惜最後冚家死曬，好慘。」佢答。

「咁點解啱我？」





「你個樣成日冇表情咁，咁慘嘅書啱曬你。」

佢見我個樣好疑惑咁，再講：「搞錯啊，你真係冇睇過。無癮啊！」佢講嘅說話，每次我都係聽唔明白，要好似估謎語咁猜測。每日見佢咁樣遊戲人間，令我以為佢真係放棄咗讀書，但喺佢轉校之後嘅第一個統測，佢已經以全科第一名嘅成績名震全校。

「真係...有眼不識泰山。」我講。

「洗乜講，唔係你覺得點解我會咁易就轉到校？」咁又係，攤開雙手就有個未來狀元自動投身，我係校長都即刻批准佢入學。

「可惜啊，俾有啲人搶咗中文作文嘅第一名，破壞曬。」佢指嘅係我。





「唔好意思，未來嘅大作家實力就係咁強橫，要唔要簽名？簽定俾你先。」

「哈哈。」佢假笑咗兩聲，然後講：「聽講你之前唔鍾意同女仔講嘢㗎喎，點解可以對住我講啲咁大言不慚嘅嘢？」

「關你鬼事。」我答。如果到今日都未令阿月討厭我嘅話，咁絕對係阿南嘅功勞。

但自從上次球賽之後，佢就好似好忙咁，就算我成日Whatsapp佢，佢都好少會覆。佢嘅忙碌，可能都係其中一個令我同阿月更加熟絡嘅原因，當花多咗時間喺一個人身上，投放喺第二個人嘅時間，自然會減少。

喺學校碰到面，每次我搵佢講嘢，佢反應都好似好冷淡，多數一句起兩句止。我甚至天真咁諗過，會唔會係佢介意我同阿月嘅接觸？





喺佢消失嘅呢一排，我每時每刻都會諗起佢。

諗起佢平時喺我面前轉嚟轉去、會講好多嘢同我分享、會鼓勵我作多啲好嘅文。

「喔！你鍾意咗阿南！」阿星話呢種日思夜想就叫做「鍾意」。