再見，是再見還是再也不見？（重製版）: 第一話

熟悉的人、熟悉的風景、熟悉的事物... 
我再次返到黎呢個熟悉既地方，慢慢地係呢個走廊步行，所有回憶好似巨浪般湧入我腦海中。
一切都冇變到，慢慢地，慢慢地進入這房間，推開這道門。 

「劉祖迪同學，你第一日就遲到咁大膽？」
「對唔住Miss Choi,龍翔道塞車呀。」
「好啦好啦，我睇下邊度有空位比妳坐先。」
「就坐係芷晴隔離啦，對人地好啲呀！」
「收到！」
 向Miss Choi 九十度鞠躬後，之後就即刻埋位。


我感受到班上所有同學望住我既視線，佢地已經對我坐既位置感到習以為常。

 坐係我隔離既叫做陳芷晴，我地中一到中五都係同班同學，呢五年亦都一直坐我隔離。
佢份人好善良溫柔，係學校公認既校花女神，沒有之一！簡直就係萬人迷。
因為我同佢成日都痴埋一齊既緣故，同學們已經當左我地係一對情侶。
而得知同學想法既晴晴並冇特登拉開我地之間既距離，反而變得更加親密。 

「Hi 晴b～」
「晴b，冇見妳一個暑假靚左好多喔。」
「B你個頭，亂講野。」


「點呀你，中六喇。」
「諗好之後打算點未？」
「我？有33222都要還神啦，哈哈哈～」
「喂呀，今年要認真讀書喇。」
「唔好講呢啲先啦，掃興-.-」
「講明先，我唔會再比你抄功課架喇！」
「咁小氣架宜家啲人。」 

叮噹～叮噹～
係久違既鐘聲響起上課的訊號，唔知點解無啦啦喊左出黎。 



「James做咩呀你，做咩喊呀！」
「唔好喊啦，唉，最多比你抄功課。」
我抹去流出的淚水
「嘻嘻，都係晴b最好！」
晴晴怒啤住我，佢呢個樣真係好得意。
「好喇好喇，唔叫你晴b喇，放心啦晴b。」

我攞住一個摺好既星星，遞比晴晴。
晴晴一臉疑惑既眼神望住我，佢雖然覺得我好奇怪，但係佢都收起左。
 …………… 

今次係我最後一次返黎喇，陳芷晴。