【愛情】關於我一覺瞓醒發現喺初戀屋企⋯！: 11. 搭訕
「我番嚟啦⋯」我疲倦咁推開屋企門，就嚟攰到連開門嘅力都冇
我番到嚟嘅時候，阿立已經坐咗喺梳化睇緊電視，但我都冇精力再去望多佢一眼，拖住腳步就行番房
沖完涼之後嘅我都懶得再開個煲嚟煮麵食，而且個人都攰到散晒
「食杯麵算啦⋯」我拎住手機行入廚房，打算打開櫥櫃睇下有咩杯麵
我聽到拖鞋嘅聲音喺廚房外傳嚟，見到阿立行入嚟廚房，企喺近廚房門口前面嘅阿立拎起水壺酙水
「食個原味啦⋯！」我打開櫥櫃嘅櫃門，望到放喺第三層嘅杯麵
平時杯麵都係我同阿立輪流買，又唔會話唔比食嘅，如果真係有自己要留嘅味，我地講好咗要貼張紙寫住
「呀⋯」我伸手去拎先發現我好似唔係好夠高，點解要將成日食嘅嘢放到咁高？
我㩒住枱邊踮起腳尖，伸直晒隻手去拎，邊個將啲杯麵推到最入⋯？叫人地要食嘅時候點拎⋯？
我回頭望一望，廚房冇可以踩一踩企高嘅嘢，我屋企平時都會擺定張高櫈喺廚房，方便拎嘢
「差啲差啲⋯！」我微微一躍，再努力咁踮起多少少，指尖可以掂到杯身，「少少⋯！」
身邊忽然有一股壓迫感傳嚟，喺我嘅手旁有一隻手伸出嚟，佢一伸手就好宜鬆咁將杯麵拎落嚟放喺枱上，佢遞起嚟嘅手臂咁啱貼住我嘅手臂
「我喺隔離，你可以開口叫我幫你拎。」阿立將杯麵拎落嚟遞比我，「嗱，原味。」
我一望就見到係阿立企喺我身旁，我隻手仍然懸喺半空，過咗兩秒，手先慢慢咁收起
好耐冇喺咁近嘅距離望佢，平時我同佢就算一齊行都會隔到好開，冇好明顯嘅尷尬都好，都會因為講嘢嗰陣嘅禮貌而察覺到陌生感，表面上好似冇將生疏感表露出嚟，但一切都喺行為上表露無遺
「唔該。」我伸手接過拎喺阿立手上嘅杯麵
「噠！」電熱水壺噠一聲，啱啱好水滾
我行到一邊拎起電熱水壺，將杯麵上嘅紙掀開一半，小心咁倒入熱水；我望向阿立，見到阿立默默咁將放喺最入嘅杯麵推番出嚟貼住層架嘅邊放
我望住阿立默默咁將杯麵擺出嚟，佢見到我唔夠高拎，所以將杯麵推番出嚟
阿立將櫃門閂埋，行番去放水壺嘅地方拎起酙滿水嘅水杯行出廚房，就好咩事都冇發生一樣
我望住倒數緊嘅計時器，喺肚餓嘅時候，連一秒都好耐⋯不過講開又講，杯麵真係好好食，發明咗杯麵嘅人真係好偉大
⋯
「先生，你嘅Espresso。」我將玻璃杯連同杯墊一齊放到枱上
「唔該。」對方禮貌咁回應咗一句
喺新嘅單嚟嘅時候，我又行番去咖啡機前面繼續沖咖啡
我拎起鋼杯，將裝咗咖啡嘅杯微微打斜，熟練咁倒出鋼杯中嘅奶，喺咖啡面上拉出一個葉嘅形狀
「小姐，你嘅Mocha。」我將Mocha小心咁放低喺客人嘅面前
對方見到面前放低嘅咖啡後，第一時間係拎手機出嚟影張相
唔⋯我覺得呢個係好普通嘅拉花，一般咖啡師都會識，好多咖啡面上都會有，所以其實好普通
不過每日類似嘅人有太多，嚟到cafe嘅第一件事就係要搵個靚位坐低影十張八要相，等佢影完嘅時候咖啡都凍晒，失去咗咖啡本來應有嘅味道
「唉⋯」我喺心入面嘆一口氣，雖然無奈但都唔可以表現出嚟
「嗨～」一個常客行入嚟，佢喺呢頭番工，中午嘅時候好多時都會見到佢過嚟買杯咖啡再番去，「照舊都係。」
「好呀。」樂恩企喺收銀機前面幫佢落單，佢呢頭㩒完，我前面嘅出單機就即刻出咗張單
佢次次嚟親都係買Americano，即係美式咖啡，即係水再加濃縮咖啡Espresso，佢嚟親都係叫呢個
「嗨～」佢行到咖啡機前面嘅座位坐低等，好彩呢個時間都唔算好多人，所以我都冇理太多
「嗨。」我禮貌咁回覆佢，畢竟佢都係常客成日嚟
「前兩日過嚟嘅時候唔見你。」佢笑笑口講道
「前兩日放假。」我抬頭微微一笑，然後又繼續專注喺我眼前嘅咖啡上
「今日又有幸咁飲到你沖嘅咖啡啦～」佢笑笑口咁講道
佢咁樣講，我都唔知點答佢⋯但為咗避免尷尬，我都係微微一笑，點一點頭
「平時你唔係日日都番㗎可？」佢嘅目光落喺我手上嘅瓦杯上，因為佢前面仲有其他單，我未沖到佢嗰杯
「嗯。」我回答道
「你平時休邊日㗎？」佢一個好奇嘅表情，但我唔太想話佢知
「唔定㗎～」我微笑道，但我講嘅係事實，真係唔定
「係呢～你有冇IG㗎？」佢靜咗一陣之後開口問我，都估到呢個先係佢真正嘅目的
「呃⋯有呀⋯」我窒咗一窒，我本來仲想扮冇，但真係講出嚟都冇人會信
「可唔可以加你？」佢即刻笑容滿面，一個善良嘅表情問我
「呃⋯我唔記得名，而且我冇帶住手機喺身⋯」我講咗個善意嘅謊言，因為我唔想比佢加我
「哦⋯咁好啦⋯」佢好似有啲失望，不過睇佢呢個順口問人攞IG嘅熟練度，一睇就知佢成日周圍問人拎，「你真係少少都唔記得？」
「唔記得，冇特別記住。」我微微一笑，禮貌咁回答佢
「哎～你收工收幾點㗎？」「你嘅Americano攞走。」
我喺佢咁樣問完嘅同時將沖好嘅咖啡擺到佢面前，面帶笑容示意佢嘅咖啡已經Okay
「下次要話我知！」佢無奈咁拎起咖啡，喺走前唔死心咁同我講
放心，我下次都唔會同佢講⋯絕對唔會⋯
IG Link: https://www.instagram.com/nd_cotttoncandy/?hl=zh-tw